филиал вгтрк государственная телерадиовещательная компания “Алания”

Тæссаг низхæссæджы рабæрæг кæнын. Ахæм уыд сæрмагонд ахуырты сæйраг нысан. Дзæуджыхъæуы аэропорты иумæйаг ахуыртæ сарæзтой Уæрæсейы фæлхасгæнджынты бартæм цæстдарды управленийы, æнæнхъæлæджы уавæрты, арæнхъахъхъæнæн æмæ таможняйы службæты кусджытæ. Æрхъуыдыгонд цаумæ гæсгæ, æндæр бæстæмæ чи цыд, уыцы хæдтæхæджы бадти тæссаг инфекциимæ бæлццон. Хъуыди йæ сбæрæг кæнын. Фыццæгтæ хæдтæхæгмæ бахызтысты фæлхасгæнджыты бартæм цæстдарды управленийы специалисттæ. Æмæ дзы ракодтой рынчынæн йæхи, стæй йæ фарсмæ чи бадти, уыдоны. Уым ын æвæстиатæй бакодтой фыццаг медицинон æххуыс æмæ йæ арвыстой районы рынчындонмæ. Уыйфæстæ хæдтæхæгмæ бахызтысты дезинфекцион станцæйы специалисттæ. Ацы ахуырты архайдтой Цæгат Ирыстоны медицинон академийы интернтæ дæр. Кæронбæттæн хатдзæгтæм гæсгæ ахуыртæ ацыдысты, куыд æмбæлы, афтæ. Æппæт службæтæ дæр сæ хæстæ сæххæст кодтой хорз.

Дыгъуызты Алыксандр, Уæрæсейы фæлхасгæнджыты бартæм цæстдарды цæгатирыстойнаг управенийы специалист: «Абоны ахуыртæ тынг хъæугæ сты. Уымæн æмæ хæцгæ низтæ парахат кæнынц. Æмæ уыдоны ныхмæ хъæуы тох кæнын. Абон æппæт службæтæ дæр иттæг хорз бацæттæ кодтой сæхи».