Зонындзинæдтæ фæуæрæхдæр кæныны фадат лæвар ис æппæт скъоладзаутæн
Иумæйаг паддзахадон фæлварæн ахсджиаг у скъолаты рауагъдонтæн. Зонындзинæдтæ фæуæрæхдæр кæныны фадат лæвар ис æппæт скъоладзаутæн. Республикæйы кусынц Иумæйаг паддзахадон фæлварæнмæ цæттæгæнæн Центртæ. Ахуыртæ куыд цæуынц, уый тыххæй бæстондæр радзурдзæн Чехойты Фатимæ.
Æрыдоны 4-æм скъолайы 11-æм къласы ахуырдзау Æрсойты Леонид лæмбынæг хъусы ахуыргæнæгмæ. Иумæйаг паддзахадон фæлварæнмæ бирæ рæстæг нал ис, æмæ лæппуйы уый тыххæй йæ бафæндыд лæвар цæттæ кæныны фадатæй спайда кæнын. Дарддæр нысан кæны Санкт-Петербурджы академимæ бацæуын. Фæнд кæны æфсæддон дохтыры дæсныйад райсын.
Уырыссаг æвзаджы ахуырты скъоладзаутæ базонынц фæлварæны цыд, алы дзуаппæн дæр куыд аргъонд цæуы, уый тыххæй. Ахуыргæнджыты ныхæстæм гæсгæ сæ, фидæны рауагъдонты цымыдисдзинад разæнгард кæны алы темæйыл дæр бæстонæй æрлæууынмæ.
Иумæйаг фæлварæнмæ цæттæгæнæн Центрты скъоладзаутимæ кусынц фæлтæрдджын специалисттæ. Ахæм фæзтæ байгом кæнын у республикæйы Сæргълæууæджы уынаффæ. Рахаста йæ 3 азы размæ. Цæгат Ирыстоны ис 19 ахæм Центры. Ахуыртæ цæуынц æппæт сæйраг предметтæй – уырыссаг æвзаг æмæ математикæ райдай æмæ бæстæзонынад, биологи æмæ физикæйæ фæуы.
Ахуырады и наукæйы министрады куыд хъусын кæнынц, афтæмæй фарон Иумæйаг паддзахадон фæлварæны рæстæмбис балл республикæйы зынгæ фæуæлдæр. Уый бантыст Центрты куысты руаджы дæр. Кæй фæнды, уыцы скъоладзаутæй алкæйы бон дæр у йæхи ахуыргæнæн къордмæ ныффыссын. Уый тыххæй хъæуы æрмæст къласы разамонæгæн зæгъын, кæнæ та – Центр кæм кусы, уыцы ахуыргæнæдонмæ курдиат бадæттын.
