Фыццаджыдæр баивтой бæстыхæйтты сæртæ
Ивгъуыд аз нæ республикæйы базылдысты 29 бирæфатерон хæдзармæ. Фыццаджыдæр баивтой бæстыхæйтты сæртæ. Уæвгæ та бындурон цалцæджы программæмæ гæсгæ ивынц инженерон хызтæ, лифтытæ, хæдзæртты æддаг бакаст, стæй ма сын фидар кæнынц сæ бындур. Цавæр куыстытæ цæуынц ныртæккæ, уый тыххæй радзурдзæн Гуытъиаты Алинæ.
Мæскуыйаг уынджы æртын дыккæгæм хæдзары дыккаг корпус сарæзтой 1977 азы. Цыппор азмæ бæстыхай ныззауат, бындурон цалцæггонд та æппындæр нæ уыд. Фæлæ дыууæ азы размæ бындурон цалцæджы программæйы фæрцы специалисттæ сæвæрдтой ног лифтытæ æмæ баивтой хæдзары цар.
Гуæцæлты Светланæ у цæрæнуæтты хицæутты æмбалады бухгалтер. Зæрдиагæй архайдта, цæмæй хæдзар бындурон цалцæджы программæмæ бахауа. Тæдзынджытимæ хæдзар тыхсын кодта сæдæ цыппор цыппар фатеры.
Ныртæккæ хæдзары цар у цæттæ, æрмæстдæр ма æнхъæлмæ кæсынц къамисы хатдзæгмæ. Ацы мæй бындурон цалцæджы программæмæ гæсгæ ратдзысты дыууæ хæдзары.
Къостайы проспекты 296 хæдзары дæр уыцы фарста лыггæнинаг уыдис. 120 фатеры цардысты тæдзынæджы, сæ тастæ æмæ донцъирæн хæцъилтæ та æдзухдæр уыдысты цæттæ.
Ацы бæстыхайы сæр уый размæ уыдис рубероидæй æмбæрзт. Специалисттæ куыд зæгъынц, афтæмæй зымæг рубероид ныссæлы æмæ аскъуыдтæ вæййы, сæрд та хурмæ атайы. Уый тыххæй хæдзары цар æрвылаз куы цалцæг кæнай, уæддæр бирæйы фаг нæ уыдзæнис.
Фарон бындурон цалцæджы программæмæ гæсгæ нæ республикæйы саив кодтой 29 хæдзары, ацы аз та 47. Специалисттæ куыд зæгъынц, афтæмæй æппæты хуыздæр фидынц Мæздæджы районы.
