Бакодтой дзы егъау куыстытæ, стæй йæ сифтонг кодтой нырыккон кусæнгæрзтæй
Ивгъуыд аз Октябрьскæйы рацарæзты фæстæ байгом кодтой Горæтгæрон районы центрон рынчындоны поликлиникæ. Бакодтой дзы егъау куыстытæ, стæй йæ сифтонг кодтой нырыккон кусæнгæрзтæй. Уымæй дарддæр ма дзы ацы азы фыццаг æмбисы кæрон нысан кæнынц сæрмагонд лаборатори байгом кæнын. Йæ фæрцы телемедицинæ парахат кæндзысты районты фельдшерон-акушерон пункттимæ. Уый фадат ратдзæн пациенттæн дардмæ консультацитæ кæнынæн. Бæстондæр радзурдзæн Фидараты Маринæ.
Ацы бæстыхайы бындурон цалцæг фæци ивгъуыд азы фæззæджы. Зæгъæн ис, æмæ районы рынчындон æххæстæй сног кодтой фыццаг хатт, 1987-æм азæй фæстæмæ. Сæйраг дохтыр Наниты Аскер куыд радзырдта, афтæмæй цалынмæ бындурон цалцæг не рцыд, уæдмæ бæстыхайы кусынæн уавæртæ æппындæр нæ уыди.
Поликлиникæ ифтонг у нырыккон кусæнгæрзтæй. Ис дзы рентген-аппарат, флюорограф, гастроскоп, компьютерон томограф æмæ æндæр хъæугæ техникæ. Уæдæ дзы байгом стоматологийы кабинет дæр. Уæвгæ, ивддзинæдтæ бирæ. Ахæм фадæттæ ам никуы уыд. Нырыккон томографийы кабинеты специалисттæн фадат ис сæры магъз, риуы гуыдыр æмæ зæрдæ иртасын. Уыимæ иртасæн куыст иу минутæй фылдæр нæ фæцæуы. Ног уавæртыл цин кæнынц районы цæрджытæ дæр. Медицинон кусджытæ куыд зæгъынц, афтæмæй поликлиникæ иу бонмæ æркæсы 600 пациентæй фылдæрмæ. Ахсджиаг у алкæмæн дæр æмбæлгæ æххуыс бакæнын.
Поликлиникæйы ног уавæртæ фенынмæ æрбацыд республикæйы æнæниздзинадхъахъхъæнынады министр Тебиаты Сослан. Куыд бафиппайдта, афтæмæй кусджытæ бакодтой стыр æмæ ахадгæ фæллой. Уæдæ медицинон лæггæдты хæрзхъæддзинадмæ дæр цæуы бæстон цæстдард.
Районы центрон рынчындоны сæйраг дохтыр ма куыд загъта, афтæмæй ацы азы фыццаг æмбисы кæрон нысан кæнынц поликлиникæйы сæрмагонд лаборатори байгом кæнын. Уымæй дарддæр телемедицинæ парахат кæндзысты районты фельдшерон-акушерон пункттимæ. Уый фадат ратдзæн пациенттæн дардмæ консультацитæ кæнынæн.
