Иугонд командæйы уæнгтæ архайдтой бирæ Уæрæсейаг ерысты, Казахстаны æмæ Тайланды та – дунеон чемпионатты
Ивгъуыд аз республикæйы шахмæтты Федерацийæн уыд æнтыстджын. Иугонд командæйы уæнгтæ архайдтой бирæ Уæрæсейаг ерысты, Казахстаны æмæ Тайланды та – дунеон чемпионатты. Æрыгон спортсментæ алы хатт дæр Ирыстонмæ сластой майдантæ æмæ лæвæрттæ. Фарон бирæ шахматисттæ райстой спортивон разрядтæ дæр. Бæлвырддæр радзурдзæн Чехойты Фатимæ.
Æрмæстдæр ыл аст азы цæуы, фæлæ шахмæттæй хъазы, цыма фæлтæрдджын спортсмен у, афтæ. Дамир Хасаншин секцимæ цæуы 2 азы. Ацы истори райдыдта, лæппу æнæнхъæлæджы йæ фыды компьютеры мониторы шахмæттæ куы федта, уæд. Йæ цымыдисдзинад рауад æнтыстджын. Райста 2-аг спортивон разряд. Уæрæсейы ерысты æвзист майдан рамбулæг, Казахстаны дунеон чемпионаты уыд 4 тыхджындæр архайæджы *хсæн. Тайланды та Уæрæсейы иугонд командæимæ рамбылдта бронзæ майдан рапидæй. Фæстæдæр та бæстæйы чемпионаты 9 азы онг кæуыл цæуы, уыцы спортсментимæ хъазгæйæ, адих кодта 1-аг æмæ 2-аг бынæттæ.
Фæстейы нæ зайынц чызджытæ дæр. 10 – аздзыд Сабанты София республикæйы чемпионаты бацахста 3-аг бынат. Чызгæн шахмæттæ хуымæтæг хъазт нæу. 3-аг спортивон разряд райсæгæн ивгъуыд аз ацыд хиуыл æнтыстджын куыстгæнгæйæ. Ног 2026 -æм азы æрыгон чемпионкæ нысан кæны федералон къæпхæнмæ рахизын.
Фæстаг дыууæ азы Цæгат Ирыстоны шахмæтты Федерацийæн сси уæлахизты рæстæг. Республикæйы фæзынд 5 ног кандидаты, спорты мастеры ном чи райста, ахæмтæ. Фарон Дзæуджыхъæуы 40-æм скъолайы командæйы архайд турнир «Белая ладья»-йы рауад æнтыстджын. Ахуыргæнæдоны минæвæрттæ Цæгат Кавказы нымад æрцыдысты хуыздæртыл.
Федераци сарæзта бирæ ерыстæ. Уыдонимæ – 9-æм маймæ мысæн «Фæлтæрты турнир», сæрдыгон ерыстæ ветеранты *хсæн Хæзныдоны, Уæрæсейы Кубокы егъау къæпхæнтæ, цæттæгæнæн æмбырдтæ Уæллаг Фыййагдоны. Шахмæтты Федерацийы æххæстгæнæг директор Цорæты Алыксандры ныхæстæм гæсгæ, ацы азмæ нысантæ сты бæрæггонд.
Æрыгон шахматисттæн ныртæккæ сарæзтой чысыл каникултæ. Фæлæ тагъд рæстæг раздæхдзысты тренировкæтæм. Разæй – ног турниртæ, æмбырдтæ æмæ фæлварæнтæ. Февралы архайдзысты Уæрæсейы чемпионаты. Республикæйы командæйы уæнгтæ сты 8 спортсмены. Фæнд кæнынц призон бынæттыл ерыс кæнын.
