Ивгъуыд азы Дзæуджыхъæуы наукон центр ныммыхуыр кодта 700 наукон уацæй фылдæр

04 марта 2013, 11:22

Сæххæст кодта 20 милуан сомы аргъ 67 проекты. Наукон организаци хатдзæгтæ скодта 2012-æм азы куыстæн. Центры сæрдар Къусраты Анатолий радзырдта Дзæуджыхъæуы наукон центры алы институты куысты тыххæй дæр.

Куыд загъта, афтæмæй сын чысыл нæ бантыст. Бацæттæ кодтой ирон æвзаджы æмбарынгæнæн дзырдуаты æтрыккаг том, рауагътой журнал «Нартамонгæ»-йы 9-æм том, чиныг «Ирыстоны истори»-йы дыууæ томы.

Дзæуджыхъæуы центр æмæ йæ организацитæ бацæттæ кодтой æппæтадæмон форум «Кавказы геополитикæ æмæ æдасдзинады фарстатæ», æппæтуæрæсеон наукон-практикон конференци «Уæрæсе æмæ Ирыстон æппæтадæмон ахастдзинæдты æмæ дипломатийы историйы», Миллеры бакастытæ.

Æмбырды ма дзырдтой Уæрæсейы наукæты академийы организациты архайд бæрæг кæныны къамисы куысты хатдзæгтыл дæр.

Къусраты Анатолий, Уæрæсейы наукæты академийы дзæуджыхъæуккаг наукон центры сæрдар: «3 институты райстой фыццаг категори, 1 институт – дыккаг, æмæ ма иу – æртыккаг. Æртыккаг категори нæ нысан кæны, æмæ уый аппаринаг у, кæнæ нæ бæззы. Уый нысан кæны йæ формæ йын аивын кæй хъæуы, уый. Амæй фæстæмæ йæ æрбаиу кæндзыстæм Дзæуджыхъæуы зонадон центрмæ æмæ уыдзæн хайад».