Ног домæнтæ сæ тыхы бацыдысты 1-æм мартъийæ фæстæмæ
Ивгъуыд азы кæрон нæ бæстæйы Президент бафыста закъон, транспорты техникон æркаст айсыны тыххæй. Нырæй фæстæмæ процедурæ раздæр куыд цыди, афтæ нал уыдзæн. Фæлæ шофырты хицæн категоритæ, раздæрау, уыцы фæтк æххæст кæндзысты. Ног домæнтæ сæ тыхы бацыдысты 1-æм мартъийæ фæстæмæ. Чи хъуамæ цæуа техникон æркаст, стæй куыд, уый базоныныл бацархайдта не сфæлдыстадон къорд, æмæ бæлвырддæр радзурдзæн Гуытъиаты Алинæ.
Егъау рад æрмæстдæр сихормæ фæкъаддæр. Технкон æркасты станцæйы абон бæрæг кæнынц машинæты æппæт хуызтæ — куыд рог, афтæ уæзласæнтæ дæр.
Æрæджы дæр ма Цæгат Ирыстоны уыдис машинæты техникон æркасты цыппæрдæс станцæйы. Фæлæ мартъийæ фæстæмæ сæ нымæц зынгæ фæкъаддæр.
Машинæтæм æркасты бар райстой, Уæрæсейы автомобилон фæдзæхстады цæдисы аккредитаци кæмæн ис, уыцы пункттæ. Ныртæккæ шофырты хъæуы рагагъоммæ сæхи ныффыссын техникон æркастмæ, цæмæй сæ æнхъæлмæ кæсын бирæ ма хъæуа.
Ног фæткгмæ гæсгæ техникон æркаст æмбæлы, æртæ тоннæйы æмæ æрдæгæй фылдæр кæм цæуы, уыцы машинæтæн, автоскъолаты рог машинæтæн, тагъд æххуысы æмæ патрулон службæйы транспорт стæй автобустæн. Ахæм мадзал чи нæ ацæуа, уыцы шофырты фæивар кæндзысты дыууæ мин сомы бæрц.
Техникон æркаст æмбæлы, цыппар азæй фылдæр кæуыл цæуы æмæ йæ хицау ивд кæмæн æрцæудзæн, ахæм рог машинæтæн дæр. Фæлæ фæдзæхстадон полис куы уа, уæд техникон æркаст нæ хъæуы.
Шофырты хъуыдымæ гæсгæ, ног уагæвæрд æвзæрын кæны бæлвырд зындзинæдтæ. Фæлæ се ппæт дæр разы сты, фæндæгты æдасдзинад сæйрагдæр кæй у, уыимæ. Аттестаци чи нæ ацыд, уыцы станцæтæ балæвæрдтой курдиæттæ. Аккредитацийы фæстæ сæ бон уыдзæнис æнцондæр фæткмæ гæсгæ техникон æркаст ацæуын.
