Йæ кадæн арæзт æрцыд бирæ мадзæлттæ. Сæ иу уыд Дзæуджыхъæуы 65 –æм рæвдауæндоны.
Ивгъуыд фæлладуадзæн бонты æппæт дунейы дæр сбæрæг кодтой кæрæдзимæ хæларзæрдæ дарыны бон. Йæ кадæн арæзт æрцыд бирæ мадзæлттæ. Се ппæты сæйраг нысан вæййы – адæмы хсæн хæлар ахастдзинæдтæ тауын, стæй кæрæдзийæн фæразон уæвын. Сæ иу уыд Дзæуджыхъæуы 65 –æм рæвдауæндоны. Алы адæмы хæттыты минæвæрттæн фадат уыд сæ традицитæ, æгъдæуттæ æмæ культурæ равдисынæн. Уыимæ ма мадзалмæ æрбацæуджыты базонгæ кодтой сæ адæмы хатты историимæ. Рæвдауæндоны фæлтæрдджын хъомылгæнæг Тауытты-Гæтиты Ларисæ иннæ хъомылгæнджытимæ зæрдиагæй бакуыста, цæмæй мадзалы программæ цымыдисаг æмæ мидисджын уа, ууыл. Цыппар бинонты фæрцы се ппæт дæр бæстонæй базыдтой уырыссаг, гуырдзиаг, сомихаг æмæ ирон адæмы æгъдæуттæ, æмæ, фæлтæрæй-фæлтæрмæ хаст чи цæуы, уыцы хъуыддæгтæ. Ацæгæй дæр кæрæдзимæ дзæбæх зæрдæ дæрыны бæрæгбон йæ сæргонды аккаг сси.
Æрмæст рæсугъд æмæ хъæлдзæг нæ рауад мадзал, фæлæ ма дзы алчидæр йæхицæн райста цавæрдæр, йæ удмæ хæстæг хъуыддаг. Бæрæгбон саразджыты хъуыдымæ гæсгæ, адæмы цæстæнгасыл бæрæг вæййы, мадзал сæ зæрдæмæ куы фæццæуы, уæд. Уæвгæ, Дзæуджыхъæуы 65 –æм рæвдауæндоны ахæм мидисджын, арф хъуыдыимæ баст бæрæгбæттæ арæх арæзт æрцæуы. Йæ директор Чертхъоты Людмилæ йæ колллективæн аразы æппæт гæнæнтæ æмæ фадæттæ, цæмæй æнæзивæгæй кусой сабиты зондахастыл. Аразой, сæ кармæ гæсгæ сын пайдайаг чи у, ахæм мадзæлттæ. Æмбары йæ фидæны адæмуарзон, раст зондыл хæст адæймаг цæмæй сабийæ рауайа, уый тыххæй йыл хъæуы архайын, кусын.
