Южныйы поселочы бындуронæй цалцæг кæнынц рæвдауæндон. Куыстытæ дзы куы райдыдтой, уæд ныййарджытæй бирæтæ сагъæсы бацыдысты, сывæллæтты кæдæм кæной, зæгъгæ.
Ивгъуыд къуырийы йæ 95 азы юбилей сбæрæг кодта Хæххон Паддзахадон Аграрон университет. Уæлдæр скъола фæсивæдæн йæ дуæрттæ байгом кодта 1918-æм азы 8-æм декабры. Йæ истори хъæздыг у алыхуызон цаутæй, зындгонд ахуыргæндты нæмттæй. Юбилейон мадзæлттæ куыд арæзт æрцыдысты, уый базондзыстут, нæ дарддæры æрмæгмæ бакæсгæйæ.
Хæххон Аграрон университет каст чи фæци, уыцы специалисттæ абон фæллой кæнынц Уæрæсейы алы рæтты адæмон хæдзарады бирæ къабæзты. 1918 азæй нырмæ ам уæлдæр ахуырад райстой 70 мин адæймагæй фылдæр. Юбилеймæ цы равдыст сарæзтой, уый дæр бирæйыл дзурæг у. Студенттæ сæ ахуыргæнджыты разамындæй æрхъуыды кодтой хойраджы, æхсыры продукцийы, нозты ног хуызтæ, хуымтæ кусыны техникон фæрæзтæ, уымæй уæлдай æрзайын кодтой, Ирыстонмæ æндæр рæттæй кæй ласынц, ахæм дыргътæ.
Айларты Арсен, Хæххон Паддзахадон Аграрон Университеты рауагъдон: «Нæ университеты кæрты ис теплицæ. Æмæ нын тынг цымыдисаг уыд, куыд æрзайдзысты, уый. Махмæ гæсгæ, æрзадысты тынг хорз. Ныр мæнæ королек фæлварæм уынджы æрзайын кæнын нæ профессор Гæздæнты Азаны разамындæй».
Цард куыд цыд, афтæ рæзыд Аграрон университет дæр. Абон дзы ис 11 факультеты, уыдоны фæсивæды ахуыр кæнынц 74 дæсныйадыл. Студенттæн дæттынц уæрæх зонындзинæдтæ, цæмæй сын æнцондæр уа куыст ссарын æмæ æнтыстджынæй архайын.
Цугкиты Валентинæ, Хæххон Паддзахадон Аграрон Университеты кафедрæйы сæргълæууæг, профессор: «Ис фæсивæд, хъæуæй чи ссыд, хъæууон хæдзарад чи зоны, йæ зæрдæмæ кæмæн цæуы. Ис сæм тырнындзинад хъæууон хæдзарад хуыздæр базонынмæ, стырдæр къæпхæнмæ схизынмæ. Ахæм фæсивæд нæм бирæ ис. Хъæуæй чи ссæуы æмæ ахуыр хорз чи кæны, уыдон сæ бынат дæр ссарынц, кусын дæр зонынц, зæххы куыст дæр уарзынц».
Аграрон Университеты ректор Темыраты Виктор куыд бафиппайдта, афтæмæй фæсивæды цы дæсныйæдтыл ахуыр кæнынц, уыдон фæстаг азты экономикæйы фылдæрæй-фылдæр хъæуынц, æмæ ахуыргæнджытæн сæ куыст кæны ноджы бæрнондæр. Республикæйы Сæргълæууæг Мамсыраты Таймураз стыр аргъ скодта Университеты ахадындзинадæн, уымæн æмæ царды сæйрагдæр бындур у зæхх, æмæ йыл кусын зонын хъæуы. Университеты ахуыргæнджытæй 12-н лæвæрд æрцыдысты кадджын нæмттæ. Юбилейы фæдыл ма арфæтæ ракодтой Парламенты сæрдар Алексей Мачнев, Цæгат-Кавказы федералон зылды ахуырадон кусæндæтты разамонджытæ.
Алинæ Левитская, Цæгат-Кавказы Федералон Университеты ректор: «Мæ коллегæтæн ма фæнды зæгъын, сæхи амондджын хъуамæ цæмæй нымайой. Уымæн æмæ сын хъысмæт ахæм фадат радта, æмæ сæ æрвылбоны куыстæй архайынц фæсивæдæй æцæг адæймæгтæ, сæ бæстæйы патриоттæ хъомыл кæныныл. Зæрдæбынæй уын арфæ кæнын. Бирæ азты ма дзæбæхæй, зæрдæрухсæй куыд кусат, ахæм арфæ уын Хуыцау ракæнæд. Бирæ уын бантысæд».
Университеты куыст афтæ арæзт у, æмæ дзы фæсивæдæн æрмæст зонындзинæдтæ нæ амонынц, архайынц, цæмæй æрыгæттæн раргом уой сæ аивадон курдиæттæ. Уымæн та æвдисæн уыд бæрæгбоны концерт.
Фæрниаты Мæдинæ
