Æвдыст дзы цæудзæн рæсугъд æмæ æнцондарæн уæлæдарæс сæрмагонд æфсæддон операцийы ветерантæн æмæ йе *нæниздзинад хъыгдард кæмæн у, уыцы адæмæн
Июны Санкт-Петербурджы ацæудзæн дизайнерты æппæтадæмон конкурс «Базыртыл». Æвдыст дзы цæудзæн рæсугъд æмæ æнцондарæн уæлæдарæс сæрмагонд æфсæддон операцийы ветерантæн æмæ йе *нæниздзинад хъыгдард кæмæн у, уыцы адæмæн. Ерыс цæудзæн 7 номинацийы. Архайдзысты дзы цæгатирыстойнаг дизайнертæ дæр. Бæлвырддæр хабæрттæ радзурдзæн Чехойты Фатимæ.
Уæлæдарæсы ног коллекци «Уæлахизы сыфтæ» саразынмæ модельер-нывгæнæг Уататы Зæринæ бавнæлдта сæрды. Фехъуыста, йе *нæниздзинад хъыгдард кæмæн у, уыцы адæмæн уæлæдарæсы æппæтадæмон конкурс «Базыртыл» кæй райдайдзæн, уый, æмæ йæ бафæндыд бацархайын. Проекты фæлгæты сæ курдиат равдисдзысты инвалид адæмы æмæ сæрмагонд æфсæддон операцийы ветеранты уæлæдарæсыл чи кусы, нæ бæстæйы уыцы дизайнертæ. Зæринæйæн йæ эскизтæ æрмæст йæ егъау фæллойы хатдзæг не сты, алкæцыйы дæр дзы бавæры йæ уды хъарм. Сразæнгард æй кодтой скифты, сæрмæтты æмæ ирон адæмы национ уæлæдарæсы фæлгонцтæ. Уыцы уæлæдарæс ирдæй æвдисы нæ адæмы миддуне, уыимæ æрмæст рæсугъд нæу, фæлæ æнцондарæн дæр.
Нывгæнæг-модельер Уататы Зæринæ сси 18 азы размæ. Уыцы рæстæгмæ йын фæзынд йæ уæлæдарæсæн йæхи ном, иу æмæ дыууæ хатты нæ архайдта алыхуызон равдыстыты. Æппæтадæмон конкурс «Базыртыл» Зæринæйæн у ногдзинад. Йæ коллекцийы ныридæгæн ис 10 фæлгонцы. Зæринæйы ныхæстæм гæсгæ, йе *нæниздзинад хъыгдард кæмæн у, уыцы адæм рæсугъд уæлæдарæсы æхсæнады сæхи ныфсджындæрæй æнкъардзысты, æнцондæр сын уыдзæн куысты дæр. Æппæтадæмон конкурс «Базыртыл» арæзт æрцæудзæн июны Санкт-Петербурджы.
Коллекциты равдысты архайдзысты сæрмагонд æфсæддон операцийы ветерантæ æмæ сæ бинонтæ. Ерыс цæудзæн 7 номинацийы: «Мах – бинонтæ», «Спорт æмæ активон цард», «Фыдыбæстæ хъахъхъæнæджы фæлгонц сабырдзинады», «Хистæр фæлтæр», «Кадджын мадзал», «Æрвылбоны хæрзвадат», «Национ дарæс». Проект фæнд кæнынц фæуæрæхдæр кæнын æмæ бæстæйы алы регионы дæр байгом кæнын инклюзивон дарæсхуыйæг куыстуæттæ.
Конкурсы фæлгæты дизайнертæ æмæ уæлæдарæс хуыйджытæ фембæлдзысты, цæмæй æрныхас кæной, рæсугъд æмæ æнцондарæн дзаумæтты хуызтыл йе *нæниздзинад хъыгдард кæмæн у, уыцы адæмæн. Уæлахиздзаутæн æххуыс кæндзысты сæ проекттæ царды уадзынæн.
