филиал вгтрк государственная телерадиовещательная компания “Алания”

06:03 пятница, 16 мая 2025
18 мая 2023, 11:32
Йæ 90 азы юбилей ацы бонты сбæрæг кодта Цæгат Ирыстоны адæмон фыссæг Хуыгаты Сергей

Дзæуджыхъæуы центрон библиотекæйы арæзт æрцыд фыссæгимæ фембæлд

Йæ 90 азы юбилей ацы бонты сбæрæг кодта Цæгат Ирыстоны адæмон фыссæг Хуыгаты Сергей. Хуссар Ирыстоны республикæйы Хæлардзинады ордены кавалер йе сфæлдыстадон фæндаг райдыдта ивгъуыд æнусы 50-йæм азты. 1962-æм азы та рухс федта йе мдзæвгæты фыццаг æмбырдгонд «Бонвæрнон». Хуыгаты Сергей кодта ахуыргæнæджы куыст дæр. Йæ юбилейы кадæн Дзæуджыхъæуы центрон библиотекæйы арæзт æрцыд фыссæгимæ фембæлд. Хуынд æм æрцыд нæ уацхæссæг Тъехты Элинæ дæр, æмæ йын бакæсæм йæ сюжетмæ.

Дзæуджыхъæуы централизацигонд библиотекæты иугонды сбæрæг кодтой фыссæг, тæлмацгæнæг æмæ поэт Хуыгаты Сергейы 90 азы юбилей. Мадзалмæ æрбацыдысты Сергейæн йе мкусджытæ, хæлæрттæ æмæ йæ аивад уарзджытæ.

Сергей сфæлдыстадон куыст кæнын райдыдта æмдзæвгæтæй. Фыста сæ, скъоладзау куы уыди, уæд. Чиныгкæсæгæн йæхи базонгæ кодта поэт æмæ прозаикæй, курдиатджын фыссæгæй, аив дзырды дæсныйæ æмæ цыргъзонд адæймагæй. Ахæмæй йæ зыдтой, йемæ чи ахуыр кодта, уыдон дæр. Сæ иу – Цыбырты Людвиг.

Зæгъын хъæуы уый дæр, æмæ Сергей куыста журнал «Мах Дуг»-ы дæр. Уыд критикæ æмæ публицистикæйы хайады редактор. Уымæ гæсгæ фыссæджы юбилейы фæдыл рауагъдады ныммыхуыр кодтой сæрмагонд чингуытæ. Мадзалы рæстæг сæ балæвар кодтой уазджытæн.

Сергей куыста Дагестаны æмæ Цæгат Ирыстоны скъолаты. Уыцы иу рæстæг ахуыр кодта Мæскуыйы, Максим Горькийы номыл литературон институты. Уый фæстæ кусын райдыдта чиныгуадзæн «Ир»-ы. Сергей рауагъдад йæхæдæг дæр хоны йæ «цæгат», уымæн æмæ дзы бакуыста 50 азы. Æмæ йæ юбилейы фæдыл йæ цæгатæй дæр райста лæвар – сæрмагонд чингуытæ.

Хуыгайы фырты сфæлдыстадæн æгæрон аргъ æрмæст фысджыты хсæн нæ, фæлæ фсивæды хсæн дæр кæй кæнынц, ууыл дзурæг у, зæгъæм, абоны мадзал дæр. Уымæн æмæ дзы уыдысты скъоладзаутæ æмæ студенттæ. Кастысты Сергейы æмдзæвгæтæ. Бирæ азты йе мдзæвгæтæ мыхуыр кодтой сывæллæтты журнал «Ногдзау»-ы. Мыхуыр сæ кæнынц ныр дæр.

Сергей канд æнкъарæнты æмæ райгуырæн уæзæджы хуызты поэт нæу. Уый зоны хицæн адæймаджы æмæ æппæт дунейы цардыл сагъæс кæнын дæр. йæ 90 азы юбилейы дæр кусы ног чиныгыл. Уыцы рæстæгмæ йын бирæ бантыст, æмæ йын нæ зæрдæ зæгъы, цæмæй йæ къухы бафта ноджы фылдæр.

vgtrk_alania
vgtrk_alania
vgtrk_alania
vgtrk_alania