Уыцы куыст кæнынц куыд хæдзары фсинтæ, афтæ консервгæнæн заводтæ дæр
Йæ тæмæны бацыд цæхджынтæ кæныны рæстæг. Уыцы куыст кæнынц куыд хæдзары фсинтæ, афтæ консервгæнæн заводтæ дæр. Не сфæлдыстадон къорд бабæрæг кодта Беслæны консервгæнæн куыстуат. Кæнынц дзы алыхуызон продукци. Уыимæ канд нæ республикæйы фæлхасгæнджытæн нæ, фæлæ ма йæ рвитынц æндæр горæттæм дæр. Бæлвырддæр радзурдзæн Хъайтмазты Дзерассæ.
Консервгæнæн заводы зымæгмæ цæттæгæнæн сезон йæ тæмæны ис. Кусджытæ банкæты æхгæнынц судзаг сырх цывзы æмæ йæ сыфтæ.
Цывзытæ 2 хатты ныхсынц. Уый æппæтæй ахсджиагдæр къæпхæнтæй иу у.
Дарддæр цывзы ногæй доны ныхсынц, цæмæй йын йæ маст сисой, уыимæ йæ судзаг æууæлтæ баззайынц. Уый фæстæ цывзы æмæ йæ сыфтæ сцæхджын кæнынц. Суткæйы фæстæ сæ боцкъаты сæвæрынц ферментаци скæныны нысанимæ. Фаг рæстæг куы рацæуы, уæд продукт сæвæрынц банкæты, байдзаг сæ кæнынц цæхдонæй, дарддæр вæййы стерилизаци 8-10 минуты 100 градусы бын. Æмæ æрмæст уый фæстæ продукт вæййы цæттæ. Ацы куыстуат Цæгат Ирыстоны у фыццаг нырыккон консервгæнæн завод. Фыццаг ам куыста Беслæны хойраджы комбинат. Арæзт уыд ивгъуыд æнусы 60-йæм азты. 2017-æм азы та ацы бынаты райдыдтой консервон продукци цæттæ кæнын.
Заводы цæттæ кæнынц цæххъуаг джитъритæ æмæ пæмидортæ, вареннæйы алы хуызтæ, аджикæ, лечо, давæттæ æмæ компоттæ. Цæттæ продукци ласынц республикæйы дуканитæм æмæ дарддæр. Æрвитынц æй Мæскуымæ, Санкт-Петербургмæ, Норильскмæ æмæ Новосибирскмæ.
