50 азы бæрц кусы телестудийы. Куыд зæгъы, афтæмæй йæм æндæр дæсныйад равзарыны хъуыды никуы ‘рцыд. Ацы бонты йын арфæ кæнынц йæ хиуæттæ, хæлæрттæ, æмæ æмкусджытæ.
Владимир Пархоменко телестудимæ æппынæдзухдæр æрбацæуы афонæй раздæр. Ацы хъуыддагыл хæст у йæ куысты фыццаг бонæй фæстæмæ. Æрдзæй лæвæрд ын у лæмбынæг æмæ бæлвырд куыст кæнын. Владимир Пархоменко у зæрдæхæлар æмæ дзырдарæхст. Арæх уыцы миниуджыты фæрцы интервью радтынмæ сразæнгард кæны æппæтæй æфсæрмыгæнаг адæймаджы дæр.
Телестудимæ Владимир Пархоменко æрбацыд 17-аздзыд лæппуйæ. Уæдæй фæстæмæ ацы дæсныйадыл йæ зæрдæ никуы сивта. Ууыл абон ахуыр кæны йæ кæстæр æмкусджыты дæр.
Гæбуаты Артур, телеоператор: «Тынг бирæ зонындзинæдтæ йæм ис, куысты дæр, царды æгъдæуттæй дæр, никуы бавгъау кодта уыцы зонындзинæдтæ йæ кæстæртæн. Амоны нын сæ. Мах дæр æм хъусæм. Володяйæн йæ гуырæн боны фæдыл арфæ кæнæм иууылдæр».
Операторы, нывгæнæг-æвæрæджы, æмæ ма суанг актеры курдиатæй дæр æххæст у Владимир Пархоменко. Ис æм стыр фæлтæрддзинад. Командировкæты уыд Мæскуыйы, Лондоны, Парижы. У профессионал æмæ хорз хæлар, зæгъынц йе ‘мкусджытæ.
Сæлбиты Аким, Уæрæсейы аивæдты сгуыхт архайæг: «Дæс æмæ ссæдз азы размæ скъола куы фæдæн, уæд кусынмæ æрбацыдтæн телеуынынадмæ. Уæд Володя куыста телеоператорæй. Мæнмæ афтæ кæсы, æмæ бирæ ирæттæ афтæ æгъдæуттæ нæ зонынц, ай сæ куыд зоны. Мæ программæйы дæр «Без лишних слов» оператор у Владимир Пархоменко».
Владимир Пархоменкойæн æнцон ссарын у фæндаг алы адæймаджы зæрдæмæ дæр. Не взары – бæрнон кусæг у, æви хуымæтæг адæймаг, фæлтæрдджын специалист æви студент. Уый тыххæй ын стыр аргъ кæнынц адæм.
Боциты Луизæ, режиссер: «Æз Володяимæ бирæ рæстæг кусын. Мæ бон цы у зæгъын. Цы æрмæг сисы, уыимæ вæййы æнцон кусын. Куыд адæймаг – хъæлдзæг у. Мæ зæрдæ йын зæгъы, цæмæй ма бирæ азты не ‘хсæн æнæнизæй æмæ хъæлдзæгæй куыд куса, Хуыцау ын ахæм арфæ ракæнæд».
Владимир Пархоменко 50 азы бæрц фæлæггад кодта йæ уарзон телестудийæн. Йæ видеокамерæ искæмæн ныууадза, уыцы хъуыды та йæм уæвгæ дæр никуы æрцыд. Йæ гуырæн боны фæдыл курдиатджын операторæн арфæ кæнынц йæ хиуæттæ æмæ хæлæрттæ. Уыдоны ‘хсæн хи бинонтау кæй уарзы, уыцы æмкусджытæ дæр.
Хъайтмазты Дзерассæ
