Уыцы мгъуыдмæ цал æмæ цал фæлтæрæн бауарзын кодта ирон уæздан кафт
Йе сфæлдыстадон архайды 60 азы юбилей бæрæг кæны Уæрæсейы Федерацийы æмæ Цæгат Ирыстоны культурæйы сгуыхт архайæг Кокайты Таймураз. Уыцы мгъуыдмæ цал æмæ цал фæлтæрæн бауарзын кодта ирон уæздан кафт. Уымæн æмæ йæ йæхæдæг дæр йæ зæрдæйы арфæй банкъардта хæрзæрыгонæй, æмæ бахауд кафты уацары. Таймураз каст фæци аивæдты училищæйы хореографион хайад. Фыццæгæм курсы студент уæвгæйæ, нысангонд æрцыд Ногдзауты Галуаны адæмон кафты ансамблы кæстæр къорды разамонæгæй. Фæстæдæр та æрлæууыд йæ сæргъы. Дæсны разамонæджы цардвæндаджы тыххæй бæстондæр радзурдзæн Хæуытаты Зитæ.
Аив уæнгты конд, гуырвидауц лæппутæ æмæ чызджытæ, рæсугъд къухты айст æмæ къахдзæф. Адæмон кæфтыты ансамбль «Маленький джигит»-ы курдиатæн æвдисæн уыдысты æмæ абон дæр сты æрмæст нæ республикæйы æмæ Уæрæсейы нæ, фæлæ ма сын сæ аивадæн, стыр аргъ скодтой æмæ сыл къухæмдзæгъдимæ æмбæлыдысты фæсарæйнаг горæтты. Бирæ хæттыты ансамбль сси уæлахиздзау куыд æппæтадæмон, афтæ æппæтуæрæсеон фестивальты.
Уæдæ цал æмæ цал фæлтæры уыдысты ацы ансамблы рауагъдонтæ…
Чысыл, фæлæ курдиатджын артистты аивады фæндагыл сывæрын, æнцон хъуыддаг нæу. Уый, фыццаджыдæр арæзгæ у ансамблы разамонæгæй. Уыцы хæс бирæ азты æххæст кæны –УФ-йы æмæ ЦИ сгуыхт кусæг Кокайты Таймураз.
Йæхиуыл æнæауæрдгæйæ, йе *ппæт хъарутæ æмæ дæсныдзинад лæвар кæны рæзгæ фæлтæртæн. Кæд, мыййаг уымæн æмæ йæхæдæг дæр Таймураз æвзонг лæппуйæ райдыдта кафын ам. Уымæй уæлдай, хæрзцыбыр рæстæджы фæстæ ансамблимæ архайдта Мæскуыйы декадæйы.
Дарддæр Таймуразæн йæ фæндаг уыд Дзæуджыхъæуы аивæдты училищæмæ хореографион хайадмæ. Йæ арæхстдзинад æмæ курдиат æнæбафиппайдæй нæ баззад разамындæй æмæ 1-æм курсы студенты снысан кодтой Ногдзауты галуаны адæмон кæфтыты ансамблы кæстæр къорды разамонæгæй. Фæстæдæр та – ансамбль «Маленький джигиты» разамонæгæй.
Куыд раздæрау, афтæ абон дæр йæ куыст æмæ архайдæн стыр аргъ кæнынц æрмæст йæ рауагъдонтæ æмæ хъомылгæнинæгтæ нæ, фæлæ ма ныййарджытæ дæр.
Мах дæр не ппæт сфæлдыстадон къордимæ иузæрдион стæм ацы арфæтимæ. Кокайты Таймурæзæн нæ зæрдæ зæгьы бирæ азты дæ зæрдæ рухс куыд уа дæ рауагъдонтæй, дæ цард та дæхи зæрдæйы фæндиаг.
