Зындгонд актер æмæ режиссер Дзиуаты Анатолий ныртæккæ артистты къордимæ кусы Лопе де Вегайы пьесæмæ гæсгæ спектаклыл. Уарзондзинадыл фыст уацмыс аивадуарзджытæ фендзысты 14-æм февралы.
Рæсугъд сурæттæ æмæ лæмбынæг куыст. Спектакль «Кæфтыты ахуыргæнæг» Ирон театры сценæйы æвæры актер æмæ режиссер Дзиуаты Анатолий. Куыд зæгъы, афтæмæй Лопе де Вегайы пьесæмæ гæсгæ спектакль у аив æмæ, бирæ æнкъарæнтæ кæм ис, ахæм уацмыс. Йæ сæйраг темæ уарзондзинад кæй у, уымæ гæсгæ актертæн æнцон нæу. Фæлæ театры ис æппæт фæрæзтæ дæр, цæмæй актерты къордæн режиссеримæ иумæ бантыса тыхджын æмæ зæрдæмæдзæугæ куыст саразын.
Дзиуаты Анатолий, Уæрæсейы аивæдты сгуыхт архайæг: «Спектакль у уарзондзинады тыххæй. Хуыйны «Кæфтыты ахуыргæнæг» Лопе де Вегайы пьесæтæн сæ тæккæ хуыздæртæй иу. Æмæ мæ фæнды, цæмæй спектакль рауайа. Фæнды мæ, цæмæй актертæ саразой хорз фæлгонцтæ, цæмæй фæцæуа адæмы зæрдæмæ. Адæм æй цæмæй райсой».
Спектаклы сæйраг хъайтар, кæфтыты ахуыргæнæг Альдемаройы сурæт сценæйы сараздзæн республикæйы сгуыхт артист Уалыты Гиви. Флорелæйы ролы та ахъаздзæн æрыгон актрисæ, Цæгат Ирыстоны паддзахадон университеты рауагъдон Дзукъаты Виктория.
Дзукъаты Виктория, актрисæ: «Флорелæйы хуызон роль алы актрисæйы дæр фæнды ахъазын. Уымæн æмæ у уарзондзинадимæ баст. Мæн фæнды стыр бузныг зæгъын нæ режиссерæн, Дзиуаты Анатолийæн. Кæй мын бабар кодта ацы роль, кæй мыл баууæндыд».
Хицæн бынат спектаклы ахсы хореографи. У алыхуызон æнкъарæнтæй дзаг æмæ æвдисы испайнаг адæмы миддуне. Уый та, æвæццæгæн æмæ тынг хæстæг у ирон адæмæн. Æппæт кæфтытæ дæр сæвæрдтой æрыгон æмæ курдиатджын хореографтæ Кокайты Алан æмæ Суанты Валерий.
Спектаклы архайы бирæ æрыгон актертæ. Пъæррæстаты Владимир æмæ Туаты Михаил та сты Щукины номыл театралон институты рауагъдонтæ. Спектаклы хъазынц республикæйы сценæйы дæснытæ – Гæлæуты Анатолий, Сæбанты Тамерлан, Хамыхъоты Дзембат, Дзасохты Иринæ, Фидараты Альберт. Сæ режиссер Дзиуаты Анатолийы разамындæй се ппæт дæр архайынц иумæйаг хъуыддаг саразыныл.
Фидараты Альберт, РЦИ-Аланийы адæмон артист: «Толик канд курдиатджын актер нæу, фæлæ ма у стыр курдиатджын режиссер дæр. Актермæ ахæм фæндаг ссары æмæ йæм цыдæриддæр æмбæхст вæййы мидæгæй, йæ курдиат, уый йын рагом кæны. Æрмæстдæр ыл хъæуы баууæндын æмæ йæ фæдыл цу».
Лопе де Вегайы пьесæтæм гæсгæ спектакльты цы актертæ хъазы, уыдонмæ хъуамæ уа алывæрсыг курдиат, зæгъы Дзиуты Анатолий. Æрмæст уæд сын рауайдзæн æххæст сурæттæ саразын æмæ пьесæйы сæйраг хъуыды театрдзаутæн бамбарын кæнын.
Ныртæккæ спектаклæн цæттæ кæнынц декорацитæ, кусынц актерты уæлæдарæсыл дæр. алцыдæр баст у 16-æм æнусы царды уагимæ. Спектаклы премьерæ уыдзæн 14 февралы.
Гугкаты Иринæ
