Афтæ зæгъæн ис, йæ царды 60 азмæ хæстæг сывæллæтты хъомыладæн чи балæвар кодта, уыцы Дур -Дуры нымад хистæр Зæнгионты Гангейы фырт Георгийæ
Кады аккаг йæ цард, кады аккаг йæ куыст! Афтæ зæгъæн ис, йæ царды 60 азмæ хæстæг сывæллæтты хъомыладæн чи балæвар кодта, уыцы Дур -Дуры нымад хистæр Зæнгионты Гангейы фырт Георгийæ. Абон дæр йе вæрæн хæссы кæстæр фæлтæры хъомыладмæ – йæ раст хъуыдытæй, йæ сарæзт хъуыддæгтæй. Уыимæ та ма сæ æхсæнадмæ хæццæ кæны чингуыты хуызы. Фæрнджын бинонты хистæры бабæрæг кодта Сосранты Жаннæ, æмæ нæм фæхæццæ кæндзæн йе нкъарæнтæ.
Æнусы рдæгæй фылдæр скъоламæ сывæллæтты йæ зонындзиндæтæ æмæ куырыхондзинадæй фæхайджын кæнынмæ чи цыд, уыцы Зæнгионты Гангей фырт Георгимæ абон та ахуырдзаутæ сæхæдæг цæуынц. Уыимæ та ма йын балæвар кæнынц йæхи фыст æмдзæвгæтæ.
Хъæуы сæрдар Хъодзасты Николай куыд зæгъы, афтæмæй Георгий хуызæн хистæрты фæллæйттæн аргъ кæнын хъæуы цæргæбонты.
Уæвгæ та æрхъуыдыдзинадæй зынаргъдæр цы хъуамæ уа, йæ цард кæстæрты хъомыладæн чи балæвар кодта, уыцы адæймагæн. Хæсты сывæллон, Ирыстоны сгуыхт ахуыргæнæг йæ куысты кой абон дæр кæны зæрдиагæй.
Георги цы стыр æвæрæн хаста Дур-Дуры скъолаты ахуырадон куыстмæ, уый ничи рох кæны. Хъæуы фыццæгæм скъолайы директор Ганоты Хъазыбеджы ныхæстæм гæсгæ Георгийы куыстмæ гæсгæ абон дæр аразынц сæ архайд.
Æрмæст Дур-Дуры нæ, фæлæ æппæт Дыгуры районы дæр Зæнгионты Георгийы кадджын ном чи нæ зоны, ахæм зын ссарæн у.
Зæнгионты Гангей фырт Георгийы царды хабæрттыл рафæлгæсгæйæ, зæгъын хъæуы уый, æмæ сæ сæйрагдæр кæй у – йæ дæсныйадæн цы рæстæг равардта, уый, стæй йæ уарзон бийнонты сарæзт. Абон йын сæ иуты æрымыст зæрдæ рæвдауы, иннæты фенд та йын йæ зæрдæ рухс кæны.
Зæнгионты Георгий фæллойадон пенсимæ рацæугæйæ дæр æнцад бадын нæ зоны. Йæ зонындзинæдтæ адæммæ хæссы чингуыты хуызы. Цыбыр рæстæгмæ ныффыста мидисджын æмæ фидæны фæлтæртæн пайдайаг чингуытæ.
Зæнгионты Георги æмæ йæ бинойнаг Рæмонты Мария се рыгон бонтæ мысгæйæ, сæ сывæллæтты хъомыладыл дзургæйæ стыр арфæйагæй хъуыды кæнынц сæ хистæрты. Куыд зæгъынц, афтæмæй бинонты æгъдæуттæ рацæуынц, уыдонæй.
Афтæ фæзæгъынц, рæстæг адæймаджы раивы, зæгъгæ. Фæлæ царды уаргъ æххæстæй йæхиуыл чи банкъардта, уыцы Зæнгионты Георгийы фæлмæн уды ахаст нæ рæстæгмæ дæр нæ баивта. Йæ бинойнаг Марийæимæ цы адæмуарзон кæстæртæ схъомыл кодтой, уыдоны туджы дæр бауагътой сæ уыцы фæзминаг миниуджытæ, æмæ сæ хæссынц дарддæр сæ кæстæртæм. Абон Мария æмæ Георгийы царды хæзна сты сæ рæстуд æмæ адæмуарзон кæстæрты æртæ фæлтæры.
