Нырæй фæстæмæ Кировы районы цæрджытæн фадат уыдзæн нырыккон диагностикæ скæнынæн дæр
Медицинон лæггæдтæ – нырыккон уавæрты. Кæрдзыны байгом кодтой ног фельдшерон-акушерон пункт. Нырæй фæстæмæ Кировы районы цæрджытæн фадат уыдзæн нырыккон диагностикæ скæнынæн дæр. Фæстæдæр та дзы фæзындзæн вакцинацийы пункт. Куыд сæмбæлдысты ацы цауыл бынæттон цæрджытæ, уый тыххæй радзурдзæн Гæджиты Сослан.
Терапевты, педиатры æмæ прививкæтæгæнæн кабинеттæ. Хуымæтæг медицицнон лæггæдтæ нырæй фæстæмæ Кæрдзыны цæрджытæн систы æнцонвадат. Хъæуы байгом, рагæй кæмæ æнхъæлмæ кастысты, уыцы амбулатори. Иу бонмæ йæ бон уыдзæн фæндзай адæймагæн балæггад кæнын.
Уæвгæ, амбулатори æмæ ма суанг фельдшерон-акушерон пункт Кæрдзыны раздæр дæр уыдысты, фæлæ дыууæ дæр кæлæддзаг уавæры. Медицицнон кусæндæттæ домæнтæн дзуапп нал лæвæрдтой. Дохтыртæн æндæр гæнæн нæ уыди, æмæ алы амæлттæ агуырдтой. Дыууæ мины æхсæрдæсæм азы амбулатори бантыст федералон программæмæ бахæссын.
Нырыккон кусæнгæрзтæ фадат ратдзысты диагностикæ кæнынæн. Уыимæ УЗИ æмæ электрокардиограммæ скæнынæн дæр. Ахæм аппараттæ районы ис æрмæстдæр дыууæ.
Амбулатори байгом кæныны кадджын мадзалы архайдтой Цæгат Ирыстоны æнæниздзинадхъахъхъæнынады министры хæстæ рæстæгмæ æххæстгæнæг Тебиаты Сослан æмæ бынæттон дохтыртæ. Ацы аз нæ республикæйы активонæй æххæстгонд цæуы рацарæзты медицинон программæ. Аразынц цыппар фельдшерон-акушерон пункты. Уымæй дарддæр ма бындуронæй сцалцæг кæндзысты æхсæз объекты. Хæстæгдæр рæстæг та ма амбулаторийы байгом уыдзæн вакцинацийы пункт. Прививкæ скæныны фадат уыдзæн алкæмæн дæр. Ныридæгæн уал дзы æвæрд æрцыд уазалгæнæн камерæ, сæрмагондæй вакцинæ дарынæн.
