Аивадуарзджытæн уыди зынаргъ сфæлдыстадон лæварау
Кæронмæ æрхæццæ фестиваль «Мариинаг –Дзæуджыхъæу». Аивадуарзджытæн уыди зынаргъ сфæлдыстадон лæварау. Цæгат Ирыстоны æнæхъæн къуыри концерттæ лæвæрдтой дунейон æмвæзады артисттæ. Фестивалы архайдтой Цæгат Кавказы федералон зылды курдиатджын сывæллæттæ дæр. Оперæ, балет, симфони. Дзæуджыхъæуы цæрджытæ æгæрон аргъ скодтой бæрзонд музыкалон аивадæн. Уазджытæй бирæтæ Ирыстоны уыдысты фыццаг хатт, сæ ныхæстæм гæсгæ сæ уæлдай тынгдæр сразæнгард кодтой хæхтæ.
Гала-концерты адæмы размæ рахастой нырыккон уацмыстæ. Цымыдисаг уый у, æмæ сæдагæй хореографион фезмæлдтытæй рауайы иу æнæбафæзмгæ кафт. Фестиваль артисттæн сæхицæндæр уыди уæлдай цымыдисагдæр. Сæхæдæг куыд зæгътой, афтæмæй балеты дунейы аныгъуылын кавказаг хæхты хсæн, уыцы иу рæстæг национ культурæ банкъаргæйæ адæймаджы зæрдæйы æвзæрын кæны бирæ рæсугъд гуырæнтæ. Фестивалы рæстæг алы бон дæр æрбацæуджыты дисы æфтыдтой алыхуызон æууæлтæ. Æнахуыр декорацитæ. Сценæйыл Мариинаг театры хуыздæр артисттæ. Залы адæмæй къух бакæнæн нæй. Адæм ковиды аххосæй культурон мадзæлттыл сæнкъард сты, уымæ гæсгæ сын фестиваль уыди сыгъдæг уæлдæфау. Аивадон бæрæгбон кæронмæ фæци, фæлæ йæ фæстæ ныууагъта хæрзхъæд музыкæйы æнкъарæнтæ.
