Лауреаттæн кад кодтой фæсивæды республикон галуаны
Хуыздæртæн хæрзиуджытæ. Кæронмæ æрхæццæ Ирыстоны фæсивæды æмæ сывæллæтты национ хæдахуыр театрты 7-æм фестиваль «Амыраны рухс». Лауреаттæн кад кодтой фæсивæды республикон галуаны. Ацы аз фестивалы архайыны тыххæй балæвæрдтой 500 курдиатæй фылдæр 7 номинацийы. Конкурс цыди дыууæ къæпхæнæй: бынæттон – ома республикæйы районты, стæй уæд кæронбæттæн. Æппæт постановкæтæ дæр æвæрд æрцыдысты ирон æвзагыл. Сывæллæттæн уый у хорз фæрæз, сæ курдиат раргом кæнынæн, стæй уæд классикон литературæимæ хуыздæр базонгæ уæвынæн. Уæлахиздзаутæн хæрзиуджытæ лæвæрдтой ирон драматургийы бындурæвæрæг Брытъиаты Елбыздыхъойы райгурæн боны агъоммæ. «Амыраны рухс», куыд иумæйаг проект, афтæ фæзынд 2017-æм азы. Бакуыстой йыл фæсивæды хъуыддæгты Комитет æмæ театр «Амыран».
