Елхоты арæзт æрцыд хæрзаудæн акци
Кæсагахсæн кусæнгæрзтæ æмæ хорз зæрдæйы ахаст. Елхоты арæзт æрцыд хæрзаудæн акци. Бæлвырддæр та – кæсаг ахсыны мадзал. Бацархайдтой дзы Кировы районы мастертæ. Цы фæрæзтæ дзы æрæмбырд кодтой, уыдон арвитдзысты Донбассы сывæллæттæн. Хæрзаудæн цымыдисаг акци федта не сфæлдыстадон къорд дæр, æмæ бæлвырддæр хабæрттæ радзурдзæн Тъехты Элинæ.
Кæсаг ахсыны ерысты Бæройты Роберт фæархайы алы аз дæр. Куыд зæгъы, афтæмæй йын уый рагон традици у. Ацы хабары сæйрагдæр у æппынæдзух тренировкæтæ кæнын. Æрмæст афтæмæй ис хорз æфтиаг скæнын. Фæлæ рамбулын йæ бон у, лыстæг кæсаг чи ахсы, уымæн дæр, уымæн æмæ уæлахиздзауты кæсаджы дæргъæй нæ бæрæг кæнынц.
Кæсаг ахсыны сусæгдзинæдтæ амонынц кæстæр фæлтæрæн дæр. Хорз æфтиаг скæнынæн кæд боныхъæд бахъыгдæрдта, уæддæр дзæгъæлы нæ сæмбырд сты, зæгъынц кæсаг ахсджытæ. Мадзал саразджытæ куыд зæгъынц, афтæмæй кæсаг ахсыны хъуыддаг хорзырдæм ахады адæймагыл. Уæлахиздзаутæн цы фæрæзтæ радтой, уыдон арвитдзысты, Донбассæй Ирыстонмæ цы сывæллæттæ ссыдысты, уыдонæн.
Алæты Константин, ерысты организатор: «Цадты хицауæн йæ цæрæнбон бирæ уæд. Куы йын загътам ахæм пайдайаг ерыстæ кæндзыстæм æмæ дзы 20% рынчын сывæллæттæн рахай кæндзыстæм, уæд дыууæ къухæй загъта о. Мæ цуры чи вæййы æмæ мæм чи фæкæсы, уыдонæн дæр цæрæнбон бирæ уæд. Сидзæрдон «Хуры тын»-æй нæм æрбацæуынц сывæллæттæ. 4 азы дæргъы семæ архайæм æмæ сæ зæрдæмæ цæуы. Архайджытæ сæхæдæг дæр улæфынц æмæ ма хорздзинад дæр кæнынц. Цы фæрæзтæ райсой, уыдон Донбассы сывæллæттæн арвитдзысты. Уадз, æмæ сын нæ номæй исты уа.»
Ерыстæ цыдысты авд сахаты. Кæсаг ахсыны размæ алы архайæг дæр сæвæрдта мысайнаг.
Ерыстæ саразджытæ зæрдæ æвæрынц, ахæм пайдайаг мадзæлттæ дарддæр дæр кæй кæндзысты, уымæй. Стæй æнхъæлмæ кæсынц, республикæйы районтæ дæр проекты кæй архайдзысты, уымæ дæр.
