Кафты ансамбль «Дети гор» сласта 4 кадджын хæрзиуæджы фестиваль «Пересвет»-ы
Кафты ансамбль «Дети гор»-ы æвзонг артисттæ ныр цалдæр азы арæхстджынæй æвдисынц сæ дæсныйад. Архайынц алыхуызон конкурсты æмæ æппæтуæрæсеон фестивальты. Зæгъæм, æрæджы уыдысты Сочийы фестиваль «Пересвет»-ы. Ирыстонмæ сластой 4 кадджын хæрзиуæджы. Уæлахиздзауты тыххæй бæлвырддæр радзурдзæн Тъехты Элинæ.
Хъуппеты Анастасиямæ йæ ныййарæг уæлдай тынг æнхъæлмæ кастис, уымæн æмæ йæ кафджыты къордимæ фыццаг хатт ацыд конкурсмæ. Сывæллæтты æмæ æвзонг артистты Æппæтуæрæсеон конкурс «Пересвет» арæзт æрцыд Сочийы. Кафты ансамбль «Дети гор» дзы райстой 4 хæрзиуæджы. Куыд зæгъынц, афтæмæй хорз æнтыстдзинæдтæй райдыдтой ног аз.
Конкурс цыд 3 боны. Бацархайдтой дзы Уæрæсейы 15 аивадон коллективæй фылдæр. «Дети гор» равдыстой 4 кафты. Дыууæ номинацийы «Ирон сюита» æмæ «Дагестайнаг кафт» бацахстой 1-аг бынæттæ. «Хохаг лæппуты кафт» æмæ спектакль «Алантæ. Æнусон кадæг»-æй скъуыддзаг райстой 2-аг бынат. Конкурсы программæ уыд тынг цымыдисаг. Равдыстой дзы нырыккон хореографи æмæ адæмты классикон кæфтытæ.
Артисттæ кæд семæ 1-аг бынæттæ сластой, уæддæр ууыл æрлæууынмæ нæ хъавынц. Ансамблы аивадон разамонæджы амындмæ гæсгæ сæ алы къухайст дæр кæнынц иу хуызон.
Козаты Станислав, адæмон ансамбль «Дети гор»-ы аивадон разамонæг: «Ацыдыстæм Сочимæ. Бацархайдтам фестивалы. Архайдтой дзы 15 коллективы. Радтой нын дыууæ фыццаг бынаты. Жюрийы уæнгтæ уыдысты Санкт Петербургæй зындгонд артисттæ. Кæд къуыри 3 хатты æмбæлæм, уæддæр нæ репетицитæ вæййынц 2-3 сахаты».
Ансамбль алы аз дæр бацархайы алыхуызон конкурсты æмæ æппæтуæрæсеон фестивальты. Фидæны «Дети гор» уæлдæр кæндзысты сæ дæсныйад æмæ сæхи вдисдзысты фæсарæйнаг сценæты.
