Сюжет баст у кадджыты хъайтартимæ
«Нартæ. Рагон аивады ног рæстæг». Кафты ирд шоу адæмон эпосмæ гæсгæ ацыд ЦИПУ-йы концертон залы сценæйы. Сюжет баст у кадджыты хъайтартимæ. Дарæс бахуыдта модельер Годжысаты Изольдæ. Бæлвырддæр радзурдзæн Чехойты Фатимæ.
Рагон фольклорон цыртдзæвæны таурæгътæ, дунеон эпикон хæзнадон чи фæхъæздыгдæр кодта – равдыстой курдиатджын кафджытæ. Традицитæ *вдисæг хореографи цæттæгонд æрцыд мæймæ. Паддзахадон академион ансамблы «Алан»-ы æмæ адæмон кафты ансамбль «Асмон»-ы артисттæ аивадуарзджытæн равдыстой ирон адæмы рагон культурæ.
Репетицитæн бахъуыд чысыл рæстæг. Музыкæ, декорацитæ æмæ дарæс – алцæмæдæр лæмбынæг цæстдард. Спектакль саразыны хъæппæрис фæзынд 10 азы размæ. Куыст ыл цыд 2 азы дæргъы. Декорацитæ æмæ дарæс бацæттæ кодта концерты аивадон разамонæг Годжысаты Изольдæ.
Цæгат Ирыстоны арæх саразынц нарты эпосы хъайтарты æмæ нæртон сылгоймæгты цыргъзондыл дзурæг мадзæлттæ. Кадджытæ хъæздыг кæнынц литературæ, нывкæнынад æмæ театралон аивад. Ахæм проекттæ æххуыс сты адæмы истори æмæ таурæгътимæ зонгæ кæнынæн. Сфæлдыстадон кусджытæн та у хорз фадат сæ курдиат равдисынæн.
Нарты эпос – ирон адæмы хæзна. Ахсджиаг у фидæныл дзурын, ивгъуыд нæ рох кæнгæйæ. Нарты таурæгътæ зонгæйæ, ахæм концерттæ фенгæйæ хъæздыгдæр кæны адæймаджы миддуне.
