Хистæр кълæсты ахуырдзаутимæ фембæлдысты Æдасдзинады Федералон Службæйы Управленийы ветерантæ Цъæхилты Феликс æмæ Гаглойты Николай
Камбилеевскæйы фыццæгæм скъолайы арæзт æрцыд антифашизмы урок. Хистæр кълæсты ахуырдзаутимæ фембæлдысты Æдасдзинады Федералон Службæйы Управленийы ветерантæ Цъæхилты Феликс æмæ Гаглойты Николай. Уыдон ахуырдзаутимæ аныхас кодтой патриотизмы æнкъарæнтыл. Стыр æргом аздæхтой, барадхъахъхъæнæг оргæнты кусджытæ цы лæгдзинад равдисынц, уыцы дæнцæгтæм. Уæдæ стыр ныфсхаст æмæ уды фидардзинад Фыдыбæстæйы Стыр хæсты рæстæг равдыстой салдæттæ æмæ хуымæтæг адæм дæр. Ветеранты ныхæстæм гæсгæ, истори хъæуы æнæмæнг хъуыды кæнын æмæ зæрдыл дарын, цæмæй йæ макæмæн бантыса ногæй рафыссын. Скъоладзаутæн ма равдыстой документалон киноныв «Бандеровцы. Война без правил». Ахæм мадзæлттæ нысан кæнынц республикæйы районты иннæ скъолаты дæр аразын.
