Истой йæ нæ республикæйы ивгъуыд аз сæрды æмæ фæззæджы
Канал «Культурæйы» уыд «Исторические курорты России»-йы циклæй документалон киноныв «Владикавказ»-ы премьерон равдыст. Истой йæ нæ республикæйы ивгъуыд аз сæрды æмæ фæззæджы. Режиссер – Ярослав Куриленко, сценарийы автор – Олег Колин. Æппæт дунейы парахат кæны змæлд «Отдыхай дома». Уæрæсейаг туристтæ арæхдæр æвзарынц нæ бæстæйы курорттæ. Уыдонæй бирæтæн бындур нырма 19-æм æнусы æвæрд æрцыд. Кинонывты цикл дзуры Уæрæсейы империйы зындгонд æмæ рохуаты чи баззад, уыцы дзæбæхгæнæнты тыххæй. Дзæуджыхъæу Уæрæсейы картæйы фæзынд 1784-æм азы 6-æм майы – ус-паддзах Екатеринæ 2-æмы паддзахадиуæджы рæстæг ацы бынæтты фидар – Арвыкомы фæндаджы форпост арæзт куы рцыд, уæд. Цыд Кавказы хæст, æмæ ацы бынæттæм цæуын æдас нæ уыд. Уый нæ фæтæрсын кодта Александр Пушкины, Михаил Лермонтовы æмæ Лев Толстойы. Уыдон бабæрæг кодтой Дзæуджыхъæу æмæ сæ ирд æнкъарæнтæ равдыстой се сфæлдыстады. 19-æм æнусы кæрон та, æфсæнвæндаг куы сæвæрдтой, уæд Дзæуджыхъæу сси курорт. Уæлдай парахат уыд альпинистты æмæ хæххон балцытæ чи уарзы, уыдоны хсæн.
