Уыимæ санитарон домæнтæ та карздæр фесты
Каникулты фæстæ ахуырмæ рацыдысты кæстæр кълæсты ахуырдзаутæ. Уыимæ санитарон домæнтæ та карздæр фесты. Æхснырсæджы миниуджытæ кæмæ ис, уыдонæй курынц, цæмæй скъоламæ ма цæуой. Специалистты ныхæстæм гæсгæ, сывæллæттæн сæ бон у вирус парахат кæнын, кæд æмæ сæхæдæг рынчын не сты, уæддæр. Хистæр кълæсты скъоладзаутæ та ахуыр кæнынц дистанцион хуызы. Ахуырадон процессы тыххæй бæлвырддæр радзурдзæн Гуытъиаты Алинæ.
Скъоладзаутæ сæ къухтæ ивазынц, цæмæй сын сæ буары тæвд сбарой, уымæн. Ууыл ныридæгæн сахуыр сты. Зонынц æй, термометрийы фæрцы вирус парахат кæнын нæ бауаддзысты. Хъыгагæн, низы тыххæй ахуырæй кæй суæгъд кодтой, уыцы сывæллæтты нымæц нырма бирæ у. Уый баст у, фæззыгон афон æхснырсæг кæй апарахат вæййы, уыйимæ.
Хистæркъласонтæ ныртæккæ сты сæ хæдзæртты, фæлæ сæ фæлладуадзынмæ не вдæлы. Ахуыр кæнынц дистанцион фæткмæ гæсгæ, конференц-бастдзинад кæнæ та ноутбукы фæрцы. Пандемияйы ацы уылæны скъолаты бон ссис дистанцион фæтк сеппæт скъоладзаутыл аххæссын. Нымæцон фæрæз кæмæ нæй, уыдонæн æй радтынц информатикæйы кабинетæй.
Сывæллæтты рæвдауæндæтты райсомæй сабитæн сбарынц сæ тæвд, уæдæ агъуыстытæ дæр кæнынц дезинфекци. Низæй хъахъхъæнынц куыд сывæллæтты, афтæ сæ ныййарджыты дæр. Скъолаты ис гæнæн, цæмæй ахуырдзаутæ кæрæдзимæ дæрддзæф бадой. Фæлæ сывæллæтты рæвдауæндæтты сабитæ æдзухдæр кæнынц æмархайд. Уый тыххæй сæ рæстæг фылдæр æрвитынц сыгъдæг уæлдæфмæ, уæлдайдæр та ныртæккæ, цалынмæ хъарм бонтæ ис, уæдмæ.
Сывæллæттæн сæ иммунитет фидар вæййы, уæдæ низæн дæр æнцондæр фæразынц. Фæлæ уыцы иу рæстæг сабийы бон у низ рахæсс-бахæсс кæнын иу адæймагæй иннæ адæймагмæ. Уый тыххæй ахуыргæнджытæ ныййарджытæм сидынц — кæд уæ цотмæ низы миниуджытæ бафиппайдтат, уæд сæ хæдзæрттæй ма уадзут.
