Æххуысагур сæм фылдæр адæм дзурын кæй райдыдтой, уымæ гæсгæ медикты хæстæ дæр фæфылдæр сты
Карздæр куысты фæткмæ рахызтысты тагъд æххуысы станцæйы бригадæтæ. Æххуысагур сæм фылдæр адæм дзурын кæй райдыдтой, уымæ гæсгæ медикты хæстæ дæр фæфылдæр сты. Адæм ныртæккæ фылдæр рынчын кæнынц ОРВИйæ. Уæлдай фылдæр дзæнгæрджытæ станцæмæ вæййы æхсæвыгон. Зæгъын ма хъæуы уый дæр, æмæ контакт-центрты куыст фæхъомысджындæр кодтой студенттæй-медиктæй æмæ ординатортæй. Ахæм æххуыс дохтыртæн цæуы Сергей Меняйлойы амындмæ гæсгæ. Бæлвырддæр хабæрттæ радзурдзæн Гуытъиаты Алинæ.
Ацы фӕсивӕд знон дӕр ма аудиториты бадтысты, абон та адӕмы цард ӕмӕ ӕнӕниздзинадыл тох кӕнынц. Куыст се нцонтӕй нӕу, зӕгъынц студенттӕ. Бирӕтӕ уайтагъд сӕ фӕндыл ӕрфӕсмон кӕнынц ӕмӕ фӕстӕмӕ аздӕхынц. Чи баззайы, уыдон та райсынц ӕмбал кӕмӕн нӕй ахӕм фӕлтӕрддзинад. Сӕ фӕллад суадзынмӕ рӕстӕг ӕппындӕр нӕй. Медицинон академийы зноны рауагъдонтӕ сӕ фидӕны ӕмкусджытимӕ дзурынц диагнозтӕ ӕмӕ низты миниуджытыл. Медицинон академийы рауагъдон Еналдыты Зӕринӕ ӕртӕ мӕйы дӕргъы ис инфекцион бригады хыгъды. Ӕрвылбон араст вӕййы, коронавирусӕй рынчын чи у, уыцы адӕммӕ.
Тагъд æххуысы бригадæтæ кусынц карздæр фæткмæ гæсгæ. Иу суткæмæ сæм æрбадзурынц 100 хатты онг. Уæлдай фылдæр дзæнгæрджытæ вæййынц æхсæвыгон. Бригады рæстæмбисæй бахъæуы 20 минуты онг. Контакт-центрты æмæ дохтырты куыст фæхъомысджындæр кодтой студенттæй-медиктæй æмæ ординатортæй. Дохтыртæн ахæм æххуыс цæуы Сергей Меняйлойы амындмæ гæсгæ.
Ацы хатт рынчын хъаст кӕны йӕ буары тӕвдыл, уӕззау улӕфт, сӕрниз ӕмӕ уӕнгты лӕмӕгдзинадыл. Багаты Фатимӕ курдиӕттӕ уары бригадӕтыл.
Фӕстаг цалдӕр мӕйы чызг кусы дыгай сменӕтӕ. Ивгъуыд суткӕйы дӕргъы фелшырон пункт райста фондзсӕдӕ дзӕнгӕрӕгӕй фылдӕр.
Хъыгагӕн низ парахат кӕны сывӕллӕты ӕхсӕн дӕр. Омикрон дельтӕйы штаммӕй дзӕвгар мӕнгарддӕр у. Йӕ миниуджытӕ сты ӕхснырсӕг ӕмӕ Орвийы хуызӕн. Рынчындӕтты кӕй ӕрӕвӕрынц, уыцы сабиты нымӕц та бонӕй бон фылдӕр кӕны.
Джиголаты Олесяйӕн контакт-центрты куыст у хорз фӕлтӕрддзинад. Йӕ хӕс у, дохтыры ӕххуыс чи агуры, уыцы рынчынты дзӕнгӕрджытӕн дзуапп дӕттын.
Афтӕмӕй сарӕзтой ахадгӕ структурӕ. Йӕ фӕрцы иумӕйаг практикӕйы дохтырты архайд цӕуы бӕлвырд фӕткмӕ гӕсгӕ. Суткӕйы дӕргъы ӕххуысагур ӕрбадзурынц 4 мин адӕймагӕй фылдӕр.
Социалон бӕрнондзинад ӕмӕ хӕлар ахаст кӕрӕдзиимӕ ӕнгом баст сты. Уый ӕмбаргӕйӕ кусынц бархион медиктӕ. Архайынц акци «Мы вместе»-йы фӕлгӕты. Фӕндзай адӕймаджы бӕрц кусынц колл-центрты оператортӕй. Байгом ӕй кодтой, карантины кӕнӕ хиипӕрды фӕткы чи ис, кӕнӕ та амбулаторон уагӕй чи дзӕбӕх кӕны, уыцы адӕмӕн. Дзурынц сӕм ӕрвылбон, исынц сӕ курдиӕттӕ дохтырты ӕххуыс кӕнӕ та хостӕ райсынӕн, дӕттынц сын амынддзинӕдтӕ. Боны дӕргъы райсынц 400 курдиаты бӕрц, низы фӕндзӕм уылӕны райдианӕй та баххуыс кодтой 7 мин адӕймагӕн.
Специалисттӕ куыд зӕгъынц афтӕмӕй ныртӕккӕ сӕйрагдӕр у ӕппӕт рынчынтыл ахӕссын. Уыцы хъуыддаджы хъуамӕ къуылымпы ӕппындӕр ма уа.
