Ахуыргæнджытæн æмæ скъоладзаутæн арфæ ракæныны тыххæй хъæумæ æрбацыдысты парти «Иугонд Уæрæсе»-йы цæгатирыстойнаг регионалон хайады Секретарь Ортабайты Тимур
Киевскæйы станицæйы скъолайы музей сси Æппæтуæрæсеон конкурс «Историческая память»-ы призер. Ахуыргæнджытæн æмæ скъоладзаутæн арфæ ракæныны тыххæй хъæумæ æрбацыдысты парти «Иугонд Уæрæсе»-йы цæгатирыстойнаг регионалон хайады Секретарь Ортабайты Тимур. Истори иртасджытæ уазæгæн скодтой музейыл экскурси, радзырдтой, ахæм экспозици сæмбырд кæнын сæ къухы куыд бафтыди, уый. Бирæ стендтæ дзурæг сты хъæуы историйыл, бакæсæн дзы ис цымыдисаг информаци.
Стæй дзы ис, Киевскæйы хъæуæн стыр кад чи скодта, ахæм адæмты биографион бæрæггæнæнтæ. Ацы хъæуы цæрджытæ сæ сæр бæрзæндты кæмæй хæссынц, уыцы æмхъæуккæгтæй иу у – Николай Мартыненко. У Намысы Ордены æххæст Кавалер, йæ ном хæссы бынæттон скъола дæр. Амы музейы сæ фыццаг хæсыл нымайынц хъæуы фронтовикты ном фæлтæрæй фæлтæрмæ хæссын. Скъолайы коллективæн лæвæрд æрцыди æртыккаг къæпхæны диплом, стæй сæ дарддæры куыстæн 200 мин сомы. Конкурс аразджытæ бæстæйы ахуыргæнæндæттæй райстой 3 мин курдиатæй фылдæр. Се хсæн Киевскæйы скъолайы музей æрлæууыд хуыздæрты æмрæнхъ.
