«Кино без барьеров: Владикавказское эхо». Се нæниздзинад хъыгдард кæмæн у, ахæм адæмы тыххæй документалон, аивадон æмæ анимацион кинонывтæ æвдыст æрцыдысты Цæгат Ирыстоны.
Фестивалы программæйы ис 15 кинонывы. Уыдон 6-æм æппæтадæмон кинофестивалы «Кино æнæ цæлхдуртæй»-ы нымад æрцыдысты хуыздæртыл. Дзæуджыхъæуы сæ равдисыныл бацархайдта инвалид сывæллæтты ныййарджыты ассоциаци «Мир». Æххуыс та сын кодтой инвалидты регионалон æхсæнадон организаци «Перспектива» æмæ Цæгат Ирыстоны паддзахадон педагогон институт. Фæстивалы сæйраг хъуыды у, инвалид-адæмы цард равдисын æмæ сæм æхсæнады ргом раздахын. Кæд се нæниздзинад хъыгдард у, уæддæр иннæтæй ницæмæй хицæн кæнынц æмæ сын ис бар се ппæтимæ иумæ цæрынæн.
Дриаты Зинаидæ, Цæгат Ирыстоны регионалон æхсæнадон организаци «Инвалид сывæллæтты ныййарджыты ассоциаци «Мир»-ы уæнг: «Ахæм фестиваль нæ горæты арæхдæр арæзт куы цæуа, уæд, уый махæн, ныййарджытæн, сæ сывæллæттæ æнæниздзинадæй æфхæрд кæмæн сты, уыдонæн хæссы тынг пайда. Мах сывæллæттæ кæм уой, уæд сæхи æмбарынц къæмдзæстыгæй. Уымæн æмæ æхсæнад ахæм у. æмæ нæ фæнды, цæмæй нын хистæртæ баххуыс кæной. Уый уыдзæнис пайда уыдоны сæвæллæттæн дæр, мах сывæллæттæн дæр».
