Бацæттæ йæ кодтой Дзанайты Азанбеджы номыл аивадон училищæйы æнусы *рдæджы юбилеймæ
Кинойы хæдзары ацыд документалон киноныв «Нам -50!» -ы премьерон равдыст. Бацæттæ йæ кодтой Дзанайты Азанбеджы номыл аивадон училищæйы æнусы *рдæджы юбилеймæ. Бакуыстой йыл ПТРК «Алани»-йы. Училищæ куы байгом, уæдæй фæстæмæ бавзæрста бирæ зындзинæдтæ, фæлæ алы рæстæджы дæр иузæрдион уыд курдиатджын нывгæнджыты, дизайнерты æмæ аивады кусджыты цæттæ кæныныл. Бæстондæр хабæрттæ радзурдзæн Чехойты Фатимæ.
Дзæуджыхъæуы аивадон училищæйы истори адæмы цæсгæмтты. Ахуыргæнджытæ, студенттæ æмæ йæ рауагъдонтæ дзурынц сæ мысинæгтæ. Сæрмагонд бынат дзы ахсынц, нывгæнджытæ сæ куыстытæ куыд фаразынц, уыцы кадртæ. Йæ режиссер у Уæрæсейы кинематографистты Цæдисы уæнг, Паддзахадон телерадиокомпани «Алани»-йы телеуынынады æмæ кинойы фонды хистæр редактор Беджызаты Иринæ.
Дзæуджыхъæуы Дзанайты Азанбеджы номыл аивадон училищæйæн бындур æвæрд æрцыд 1973 азы. Ахуыргæнæндон саразыны фæнд æрцыд, нæ регионы аивады къабазы профессионалон кусджытæ фаг кæй нæ уыд, уымæ гæсгæ. Ам хъуамæ архайдтаиккой бæстæйы æмæ дунейы аивады хæзнатæ хъахъхъæныныл æмæ кусын республикæйы аивадон традициты рæзтыл. Училищæйы студенттæ активонæй фаархайынц алыхуызон равдыстыты æмæ конкурсты. Сæ куыстытæн сын скæнынц стыр аргъ. Рауагъдонтæй бирæтæ дарддæр ахуыр кæнынмæ бацæуынц Уæрæсейы æмæ дунейы раззагдæр аивæдты уæлдæр ахуыргæнæндæттæм. Уый ирдæй æвдыст æрцыд кинонывы.
Училищæйы ахуыргæнджытæ сты Уæрæсейы зæронддæр æмæ æппæтæй кадджындæр уæлдæр аивадон ахуыргæнæндæтты рауагъдонтæ. Уыдонæй иу – зындгонд скульптор Дзбойты Михал.
Кинонывы фенæн ис стæм архивон кадртæ. Уыдон фыццаг уысмæй фæстæмæ сæхимæ *лвасынц адæймаджы цæст.
Сæдæгай адæм æрбацыдысты Дзанайты Азанбеджы номыл аивадон училищæйы 50 – ай азы кадæн документалон кинонывы премьерæмæ. Уыдонимæ – республикæйы Хицауады сæрдары хæдивæг Платы Альбинæ.
Киноныв хъæздыг у историон хабæрттæй, рауагъдонты куыстытæй, сæйрагдæр та – курдиатджын адæмы тыххæй мысинæгтæй. Уыдон алкæйы зæрдæмæ дæр ссардзысты фæндаг.
