Сæйраг рольтæ хъазыдысты Кирилл Кяро, Глеб Калюжный, Стася Милославская, Дмитрий Куличков æмæ Дмитрий Чеботарев
«Челюскин. Первые». Ацы кинонывы премьерæйы размæ равдыст уыди Дзæуджыхъæу дæр. Йæ размæ республикæйы сæргълæууæг Сергей Меняйло фембæлд онлайн-кинотеатр Wink -ы разамонæг Антон Володькинимæ æмæ контентон политикæйы директор Александр Косаримимæ. Ныхас цыд регионалон контентимæ куыстыл. Уазджытæн тынгдæр цымыдисаг уыдысты раздæры ирон кинонывтæ. Бæлвырддæр радзурдзæн Чехойты Фатимæ.
1934 азы февраль. Цæгаты денджызон фæндагыл ацæуын Советон Цæдисæн уыд ахсджиаг нысан. Ныфсджын фæсивæд Отто Шмидтимæ нау «Челюскин»-ыл сфæнд кодтой уыцы хæс сæххæст кæнын. Экспедицийы рæстæг бавзæрстой зындзинæдтæ. Æвдыст цæуы, хъайтартæ аирвæзыныл куыд архайынц, уый.
Сфæлдыстадон къорд проектыл куыста 2 азы дæргъы. Уæрæсейы цæгатаг хай – Санкт-Петербург, Архангельск, Чукоткæ æмæ Мурманск – уыдысты проекты географион бынæттæ.
Киноныв «Челюскин. Первые»-йы сæйраг рольтæ хъазыдысты Кирилл Кяро, Глеб Калюжный, Стася Милославская, Дмитрий Куличков æмæ Дмитрий Чеботарев.Тæхæджы ролыл бакуыста республикæйы министр Фидараты Сослан. Уый ныхæстæм гæсгæ, киноныв дзуры, Советон Цæдисы рæстæг Цæгатаг денджызон фæндадагæн цы стыр историон нысаниуæг уыд, ууыл.
Историон бæлвырддзинады тыххæй сфæлдыстадон куыстмæ хуынд æрцыдысты экспедицийы архайджытæ æмæ сæ хиуæттæ. Проектæн рухс фенын бантыст интернеты рæзты институты æххуысы руаджы. Равдысты агъоммæ республикæйы сæргълæууæг Сергей Меняйлойæн продюсеримæ цы фембæлд рауад, уым ныхас цыд регионы кинойы рауагъдады фарстытыл, республикæйы кинематограф саразыныл, фидæны сфæлдыстадон куыстыл нæ субъекты рæсугъддæр бынæтты.
