филиал вгтрк государственная телерадиовещательная компания “Алания”

Пушкин Дзæуджыхъæуы. Абон Кировы æмæ Миллеры уынгты тигъыл кадджын уавæры байгом кодтой номдзыд уырыссаг поэт Александр Пушкины цыртдзæвæн. Бынæттон цæрджытæн ахæм лæвар скодта скульптор Соскъиты Владимир. Йæ ныхæстæм гæсгæ, скульптурæ дзурæг у историон цауыл, – 1830-æм азы поэт фыццаг хатт Дзæуджыхъæу куы бабæрæг кодта, ууыл. Цыртдзæвæн байгом кæныны кадджын мадзалы кастысты зындгонд поэты æмдзæвгæтæ. Уырыссаг академион театры артисттæ та равдыстой цымыдисаг инсценировкæ. Скульптор поэты равдыста галуæрдоны. Уæды рæстæджы уый хохæгтæн уыд æппæтæй арæхдæр транспорты хуыз. Бæрæг куыд у, афтæмæй Пушкин Кавказы уæвгæйæ дыууæ боны арвыста Дзæуджыхъæуы фидары. Уазæгуаты уыд бынæттон интеллигенцимæ. Хорзыл банымайæн ис уый дæр, æмæ цыртдзæвæн поэзийы æппæтдунеон боны кæй байгом кодтой, уый. Проектæн фæрæзтæ радих кодта Боллоты Таймураз. Нæ республикæйы Пушкинæн уый уыдзæн дыккаг цыртдзæвæн.

Дзбойты Михал, УФ-йы сгуыхт, РЦИ-Аланийы адæмон нывгæнæг: «Валодя ратас-батас нæ кæны. Куыд уыны, афтæ кæны йæ скульптурæтæ, йæ миддуне дзы æвдисы. Æз дæр кæддæр хъавыдтæн Пушкинæн цыртдзæвæн скæнын, фæлæ йæ æз уыдтон каретæимæ. Цæмæндæр мæм ахæм хуызы хæстæгдæр уыд. Фæлæ Пушкин ам куы уыди, уæд фылдæр галуæрдæттæ уыди. Уымæ гæсгæ йæ Валодя дæр скодта афтæ. Мæнæн мæ зæрдæмæ тынг цæуы ацы композици».