Афтæмæй æрымысыдысты районы администрацийы сæргълæууæджы хæдивæг Куыдзеты Геннадийы рухс ном
Кировы районы арæзт æрцыд футболæй номарæн турнир. Афтæмæй æрымысыдысты районы администрацийы сæргълæууæджы хæдивæг Куыдзеты Геннадийы рухс ном. Уæвгæ йæ Кировы районы хорз зыдтой, æмæ йын кад кодтой. Уымæн æмæ кæддæриддæр æххуыс кодта бынæттон цæрджытæн. Уæлдайдæр та – пандемияйы рæстæг. Æххуыс кодта хойраджы продукттæй æмæ хостæй дæр. Фæлæ, хъыгагæн, йæхи бон ацы низы ныхмæ фидар фæлæууын нæ бантыст. Номарæн турниры тыххæй бæлвырддæр радзурдзæн Гуытъиаты Алинæ.
Цъæх газоныл карз тохы бацыдысты æрыгон футболисттæ. Цæуы Кировы районы дзырддзæугæдæр лæгтæй иу – Куыдзеты Геннадийы номыл турнир. Ерыстæ рауадысты цыбыр форматы. Командæты уыдис фæйнæ авд адæймаджы.
Кировы районæй аст командæйы ерыс кодтой дыууæ къæпхæнæй. Финалы фембæлд уыдис «Ирыстоны» æмæ «Кæрдзыны» командæты хсæн æмæ ахицæн æмхуызон хыгъдæй. Уый фæстæ снысан кодтой иуæндæсметрон цæф. Тыхджындæр разындис «Ирыстоны» командæ. Уæлахиздзауты хорзæхджын кодтой Дзæджыхъæуы «Аланийы» футболисттæ Дзæхаты Давид æмæ Суанты Руслан.
Ерысты уæлахиздзаутæ райстой майдантæ æмæ лæвæрттæ клуб «Аланийы» президент Гуыриаты Владимиры номæй. Уымæй уæлдай сын радтой Куыдзеты Геннадийы номыл кубок. Ноджы сын ис бар матчты сырх æмæ бурхуыз формæйы архайынæн. Турнир суыдзæн æрвылазон æмæ фидæны ацæудзæнис ног фæзыл. Станицæйы разамынд зæрдæ бавæрдта, тагъд рæстæг быдыры ног æмбæрзт кæй байтаудзысты, уымæй.
