Куы сæ сæххæст кæной, уæд районы цард зынгæ аивдзæн хуыздæрырдæм
Фæндæгтæ æмæ æхсæнадон территоритæ саив кæнын. Культурæйы ног Хæдзар саразын. Кировы районы сæ тæмæны бацыдысты паддзахадон программæтæм гæсгæ цалцæггæнæн куыстытæ. Куы сæ сæххæст кæной, уæд районы цард зынгæ аивдзæн хуыздæрырдæм. республикæйы журналисттæн арæзт æрцыд пресс-тур арæзтадон объекттыл. Уымæй дарддæр ма радзырдтой, районы вакцинаци куыд цæуы, уый тыххæй. Бæлвырддæр хабæрттæ радзурдзæн Касаты Наирæ.
Ног культурæйы хæдзар арæзт цæуы Ставд-Дурты. Ныртæккæ объекты кæронмæ фæхæццæ кæнынц бындурæвæрæн куыстытæ. Хъæуы амæй размæ, зæгъæн ис, æмæ культурæйы артдзæст нæ уыди. Уæвгæ дзы уыди бæстыхай, фæлæ йæ банымадтой кæлæддзагыл. 200 бынатæн ног культурæйы хæдзар дзуапп дæтдзæн æппæт нырыккон домæнтæн. Куыстытæ дзы фæуыдзысты ацы азы кæрон. Объекты арæзтад цæуы, национ проект «Культура» æххæстгæнгæйæ.
Уыцы иу рæстæг Кировы районы дарддæр цæуы дзыллон вакцинаци. Уый тыххæй журналисттæн радзырдта сывæллæтты радхæссæг дохтыр Сæлбиты Ланæ. Куыд æппæт республикæйы, афтæ Кировы район дæр райсдзæн вакцинæйы ног парти. Абоны онг дзы ис прививкæтæгæнæн æртæ пункты. Уый, Елхоты, Змейкæйы æмæ Кæрдзыны.
Елхоты центрон уынгтæй иу, Зортаты Уырысбийы уынджы æвæрд цæуы ног асфальт. Ам бындуронæй цалцæг кæнынц фæндаг, æдæппæтæй км æмæ рдæг. Объекты фæнд кæнынц бордюртæ сæвæрын æмæ фистæгæй цæуджытæн фæндаг саразын.
«Хъæуты аивдзинадыл кусыны» æмæ «Горæты æнцонвадат царды» программæты фæлгæты районы дарддæр цалцæггонд цæуынц цалдæр æхсæнадон зонæйы, уыимæ сног кæндзысты администрацийы цур фæз дæр. Змейкæйы сывæллæттæн та сараздзысты ног хъазæн фæз.
