Спикер Тускъаты Таймураз æмæ депутаттæ бабæрæг кодтой историон-бæстæзонæн музей, аныхас кодтой фæсивæдимæ
Кировы районы уыд республикæйы Парламенты Советы рацæугæ æмбырд. Спикер Тускъаты Таймураз æмæ депутаттæ бабæрæг кодтой историон-бæстæзонæн музей, аныхас кодтой фæсивæдимæ. Районы социалон-экономикон райрæзты хатдзæгтыл æмæ æндæр ахсджиаг фарстатыл та æрдзырдтой æмбырды. Бæлвырддæр радзурдзæн Хъайтмазты Дзерассæ.
Республикæйы Парламенты советы рацæугæ æмбырды программæ æххæстгæнгæйæ, Тускъаты Таймураз сæмбæлд Кировы районы активон фæсивæдимæ. Уыдон æм радтой алыхуызон фæрстытæ. Цымыдисаг сын уыдис, æрыгон фæлтæрæн æххуысæн цавæр механизмтæ ис, уый, фарстой Тускъаты Таймуразы ахуыргæнæджы æмæ политикон фæндаджы тыххæй. Парламенты сæрдар куыд загъта, афтæмæй ахæм фæсивæд сты республикæйы фидæн.
Парламенты сæрдар Тускъаты Таймураз ма бабæрæг кодта Кировы районы историон-бæстæзонæн музей. Ам лæмбынæг хъахъхъæнынц цытджын намыс. Экспозицийы – хæцæнгæрзтæ, хуызистытæ, ордентæ, майдантæ æмæ хæстон техникæйы хæйттæ, стæй знаджы чи баурæдта, уыцы хъæбатырты тыххæй информаци. Сæрмагонд æргом музейы аздæхтой салдæтты фыстæджытæн фронтæй.
Парламенты Советы æмбырды боны фæткы уыд 8 фарстайы. Се *хсæн сæйрагдæр систы районы социалон-экономикон райрæзты хатдзæгтæ ивгъуыд азмæ, стæй ахуырады системæимæ баст фарстатæ. Нæ фаг кæны математикæйы, уырыссаг æвзаджы, физикæйы æмæ географийы ахуыргæнджытæ. Нацпроекттæ æххæст кæнынæн ис ахадгæ хатдзæгтæ ног скъолаты æмæ «Точка роста»-йы центрты хуызы, фæлæ уыимæ уæлæмхасæнæй бакусын хъæуы æрдзон наукæтæй бæрæггæнæнтæ фæхуыздæр кæныныл, загъта Парламенты сæрдар.
Тускъаты Таймураз фæнысан кодта экономикон бæрæггæнæнтæ хуыздæр кæныны тенденци. Йæ ныхæстæм гæсгæ, уый у куыд районы разамынды, афтæ алы æнæзæрдæхудт цæрæджы фæллойы хатдзæг.
Парламенты советы рацæугæ æмбырдтæ хорзырдæм ахадынц районы райрæзтыл, æмæ æххуыс кæнынц риссаг фарстатæ бынаты лыг кæнынæн.
