Бирæ азты цæры Уæрæсейы, Цæгат Ирыстоны
Кодзуки Ватанабэ у уазнывтæ аразæг, Японийæ. Бирæ азты цæры Уæрæсейы, Цæгат Ирыстоны. Ам ын радтой ном Зойæ. Ахуыр кодта Сергиев посады, ныртæккæ та кусы Дзæуджыхъæуы епархийы. Йæ къухæй конд уазнывтæ сты æппæт дунейы чырыстон аргъуанты.
Кодзуки Ватанабэ райгуырд Киотойы, хъомыл кодта Токиойы, ныртæккæ та цæры Уæрæсейы, Дзæуджыхъæуы. 7 мин километры сæрты ахызт сæрмагонд нысанимæ – Японийы, уазнывтæ кæныны хъуыддаг рæзын кæныны тыххæй. Сахуыр кодта Сергиев Посады, абон та кусы ам, Уырыссаг Чырыстон Аргъуаны Дзæуджыхъæуккаг Епархийы. Йæ уазнывтæ сты Уæрæсейы алы регионты аргъуанты æмæ ма суанг æппæт Уырысы Мæскуыйаг патриарх Кириллы коллекцийы дæр.
Епархийы йæ се ппæт дæр хонынц Зойæ. Уыцы ном ын радтой аргъуыды рæстæг. Динимæ йæ сабибонтæй зонгæ уыд, фæлæ хæстæг нæ. Йæ мад – чырыстон, йæ фыд – буддист. Дин равзæрста æмбаргæ кары. Зойæйыл 23 азы куы цыд, уæд йæ бинонтæй иу уæнг йæ цардæй ахицæн. Саударæн мадзæлттæм цæттæгæнгæйæ хæдзары ссардта рæсугъд дзуар. Куыд æй хъуыды кæны, афтæмæй дзаума уыд дæсны конд. Уæд ныхъхъуыды кодта, кæм кæнынц ахæм рæсугъд дзауматæ æмæ цы у чырыстон аргъуан.
2007-æм азы арæх бæрæг кодта Токиойы Чырыстийы Райгасы аргъуан, зындгонд у куыд НикорАй-дО. Зойæ æххуыс кодта алыхуызон куыстытæ кæнын, уазджытæн дзырдта чырыстон аргъуаны фæткы тыххæй. Уæд базонгæ алчыр Герасимимæ. Уый йæ æрбахуыдта Уæрæсемæ уазнывтæ кæныны æрмдæсныйадыл сахуыр кæнынмæ.
Зойæ куыд зæгъы, афтæмæй япойнæгтæн нæй æцæг уазнывтæ царды уыныны фадат. Бирæтæ сæм кæсынц, куыд рагон аивадмæ нæ, фæлæ куыд хоббимæ. Йæхицæн Зойæ бамбæрста, семинарийы, уазнывтæ кæнæн скъолайы куы нæ ахуыр кæна, уæд уазнывты мидис æмæ сæ раст кæныны техникæ фæхæццæ кæнын нæ бантысдзæн.Фæнды йæ, йæ адæмы сахуыр кæнын рагон æмæ æцæг уазнывтæ кæныныл.
Чырыстон дин Зойæйæн æрмæст Хуыцауæн кад кæнын нæ нысан кæны. У йын, зæрдæхæлар адæмимæ æнгомдæр кæныны æмæ истори ахуыр кæныны фадат, сæйрагдæр та йын нысан кæны – йæ адæмыхаттмæ уарзондзинад.
