Проекты разамонæг у Цæгат Ирыстоны сгуыхт нывгæнæг Армен Гаспарянц
«Къостайы цард»… Ахæм сæргондимæ композици саив кодта Дзæуджыхъæуы Хетæгкаты Къостайы хæдзар-музейы къултæ. Композици саразыныл бакуыстой Дзанайты Азанбеджы номыл аивадон училищæйы студенттæ. Проекты разамонæг у Цæгат Ирыстоны сгуыхт нывгæнæг Армен Гаспарянц. Ацы куысты ирдæй зынынц ирон адæмы уарзон хъæбулы царды сæйрагдæр цаутæ. Ахæм цымыдисаг проект царды рауагътой Къостайы райгуырды 165 азы бонмæ. Аив композицийы тыххæй бæстондæр радзурдзæн Фидараты Маринæ.
Нарыхъæу, сидзæр азтæ, Санкт-Петербурджы аивæдты Императорон академийы ахуыр… Ирон литературæйы бындурæвæрæджы царды ахсджиагдæр цаутæ æвдыст æрцыдысты Дзæуджыхъæуы Хетæгкаты Къостайы мемориалон хæдзар-музейы. Ам фенæн ис стыр поэты æппæтæй ахсджиагдæр царды хабæрттæ. Иу сюжетæй иннæмæ, раст цыма рæстæджы цæугæдон кæлы, афтæ кæлынц йæ къухфыстытæ æмæ æмдзæвгæтæй рæнхъытæ. Абарæн кæмæн нæй, ахæм цымыдисаг куыст скодтой Дзанайты Азанбеджы номыл аивадон училищæйы 3-æм курсы студенттæ.
Ацы куыст у командон. Алчи дæр бахаста зынгæ æвæрæн концепци саразынмæ. Æртæ мæйы дæргъы 14 студенты куыстой эскизтыл æмæ æвзæрстой ахорæнты хуызтæ. 20 куыстæй равзæрстой иу. Уый æппæтæй хуыздæр баххæст кодта музейы хуызы хъарм палитрæ. Афтæмæй æрлæууыдысты Хъалæгаты Сæрмæты хуызджын формæйыл. Ацы вариант банымадтой се ппæтæй хуыздæрыл. Студенттæ сæ проект арæзтой, сæрдыгон ахуырадон практикæйы программæ æххæст кæнгæйæ. Пайда кодтой историон документтæй, портреттæй, хуызистытæй æмæ архивон æрмæджытæй.
Проект баст у Хетæгкаты Къостайы райгуырды 165 азы бонимæ. Экспозицийыл кусгæйæ пайда кодтой мелæй æмæ акрилæй ахорæнтæй. Мемориалон хæдзар-музей рагæй дæр æмгуыстад кæны Дзæуджыхъæуы аивадон училищæимæ. Алы азты-иу ам студенттæ равæрдтой се сфæлдыстадон куыстытæ. Экспозици «Къостайы Цард» – уый у училищæйы лæвар. Музейы ма фæзындзысты 11-æм æнусы аргъуаны макет. Уым йæ рæстæджы Къостайыл бафтыдтой дзуæрттæ. Уыдзæн ма дзы 19-æм æнусы стилы конд æфсæйнаг аивгонд гыццыл стъол.
Хетæгкаты Къостайы мемориалон хæдзар-музейы æдæппæтæй ис 400 экспонатæй фылдæр. Йæ сæргълæууæг Атарты Зæлинæйы ныхæстæм гæсгæ, ма нысан кæнынц экспозици аудиохъусынгæнинæгтæй баххæст кæнын. Афтæмæй дзы зæлдзысты поэты æнæмæлгæ æмдзæвгæтыл фыст зарджытæ æмæ йæ уацмыстæй скъуыддзæгтæ.
