филиал вгтрк государственная телерадиовещательная компания “Алания”

Конкурс «Авто-леди» та радон хатт арæзт æрцыд Дзæуджыхъæуы. Архайдтой дзы республикæйы сылгоймæгтæ, машинæ йæхæдæг чи скъæры, уыдон. Фæстаг азты сæ нымæц зынгæ фæфылдæр. Уымæ гæсгæ паддзахадон автоинспецийы кусджыты фæнд уыд ацы конкурсы руаджы адæмы ргом раздахын æппæт фæндаггон æгъдæуттæ æххæст кæныны хъуыддагмæ. Ныхасы бар нæ уацхæссæг Гугкаты Иринæйæн. Конкурсы архайынмæ курдиæттæ балæвæрдтой 15 сылгоймаджы. Сты алы къабæзты архайджытæ, фæлæ се ппæты дæр иу кæны, шофыртæ дæр ма кæй сты, уыцы хъуыддаг. Ныр дыккаг хатт ацы æркаст арæзт цæуы республикæйы фæндæгтыл æдасæй цæуыны паддзахадон автоинспекцийы хъæппæрисæй. Архайджытæн, жюрийы уæнгтæн æмæ уазджытæн арфæйы ныхæстæ загътой фæндаггон структурæты разамонджытæ, æхсæнадон архайджытæ. Се ппæты дæр сæ аивадæй сбуц кодтой республикæйы зындгонд зарæггæнджытæ æмæ сфæлдыстадон къордтæ. Конкурсы архайджытæм сæйраг домæн уыд – машинæ скъæрын зонын. Манежы арæзт æрцыд сæрмагонд фæз. Уым æвдыстой сæ арæхстдзинад. Хъуыдис сæ цæлхдурты фæрсты ацæуын, машинæ æрлæууæн бынатмæ батæрын, нарæг фæндагыл æнæ къуылымпыйæ ацæуын. Уыцы домæнтæ сæххæст кæнын хъуыд цыбыр рæстæгмæ. Æппæтæй ирддæр та рауад конкурсы сфæлдыстадон къæпхæн. Ам алы архайæг дæр йæхи хъуамæ бацæттæ кодтаид æмæ равдыстаид фæндаггон æгъдæуттимæ баст инсценировкæ, кæнæ бакастаид æмдзæвгæ, бацæттæ кодтаид зарæг кæнæ кафт. Архайджытæй бирæтæн æххуыс кодтой сывæллæттæ. Уый тыххæй конкурс рауад цымыдисагдæр. Æппæт къæпхæнты хатдзæгтæм гæсгæ фыццаг бынат бацахста тæрхондæтты пъырыстыфты федералон службæйы цæгатирыстойнаг управленийы кусæг Такъоты Денизæ, дыккаг бынат райста Цыколайы минæвар Гуæцъæлты Регинæ, æртыккаг та – Æрхонкæйы 1-æм скъолайы ахуыргæнæг Дадтеты Оксанæ. Æппæт архайджытæн дæр раарфæ кодта фæндæгтыл æдасæй цæуынын паддзахадон автоинспекцийы хицау Беккуызарты Хасанбег. Куыд загъта, афтæмæй, машинæ тæргæйæ, æппæтæй сæйрагдæр у адæймаджы цардæн аргъ кæнын. Уый уыд конкурсы хъуыды.

Гугкаты Иринæ