Ссардтой дзы Цæгат Ирыстоны адæмон артисткæ Реуазты Симæйы рухс ном
«Фæндыры зарæг»! Ахæм сæргондимæ конкурс арæзт æрцыд Дзæуджыхъæуы. Ссардтой дзы Цæгат Ирыстоны адæмон артисткæ Реуазты Симæйы рухс ном. Сывæллæтты сфæлдыстады Галуаны сценæмæ рацыди сæдæйæ фылдæр æвзонг курдиаты æппæт республикæйæ. Ацагътой зындгонд фæндырдзæгъдæджы композицитæ. Конкурс аразджытæ зæгъынц, ахæм мадзæлттæ, иуæй, рæзгæ фæлтæрæн æххуыс сты сæхи равдисынæн, иннæмæй та – ирон аивады дæснытæ нæ рох кæнынц адæмæй. Ацы фæсивæдæй бирæты фæнды профессионалон фæндырдзæгъдджытæ суæвын. Сæхицæн дæнцæгæн исынц Реуазты Симæйы. Йæ композициты адæймаг æнкъары цавæрдæр æнусон комулæфт. Йе мкусджытæ йæ хонынц музыкæйы зæлты «архитектор». Уый, ирон национ культурæйы уникалон æууæлтæ сæмбырд кодта, æмбал кæмæн нæй, ахæм хуызы. Симæйы дæсны цагъды фæрцы Ирыстоны этникон музыкæ райста ног хуыз. Йæ курдиатæй хайджын кодта музыкантты цалдæр фæлтæры. Абон сæрыстыр сты, ахæм хъуыстгонд ахуыргæнæджы тæвагæй кæй фæхайджын сты, уымæй. Ацы аз дæр «Фæндыры зарæг» баиу кодта, ирон аивад зæрдæйæ чи уарзы, ахæм фæсивæды. Сæ курдиатæн сын аргъ кодтой Цæгат Ирыстоны адæмон артисттæ. Уæлахиздзаутæ æмæ призертæ хорзæхджынгонд æрцыдысты зынаргъ лæвæрттæй.
