Архайдтой дзы Цæгат Кавказы 88 æрыгон разамонæджы, уыдонæй 5-æй сты нæ республикæйæ
Цыфæнды фарста алыг кæнынæн дæр мадзæлттæ ссарын, æмæ йыл куыд гæнæн ис, афтæ растдæр бакусын. Ахæм хæс æвæрд уыди конкурс «Лидеры России»-йы архайджыты размæ. Юбилейон, фæндзæм сезоны финал ацыди Пятигорскы. Архайдтой дзы Цæгат Кавказы 88 æрыгон разамонæджы, уыдонæй 5-æй сты нæ республикæйæ. Алы адæймаг дæр дзы тох кодта суперфиналмæ рацæуыны барыл. Бæрæггæнæнтæм гæсгæ хуыздæртыл нымад æрцыдысты 9 адæймаджы. Ацы аз куысты системæ аивта. Æрмæст стратегион хъуыдыкæнынад дзы нæ хъуыди, ахсджиаг дзы уыди разамонæджы æууæлтæ равдисын дæр. Фæзынди дзы ног тестытæ, стæй регионалон къæпхæн. Конкурс «Лидеры России» арæзт цæуы 2017-æм азæй нырмæ, бæстæйы Президенты уынаффæмæ гæсгæ. Уыцы рæстæгмæ проекты архайынмæ сæ курдиæттæ балæвæрдтой дунейы 150 бæстæйæ милуан адæймагæй фылдæр.
