Уæлæмхасæн ахуыррады педагогты 10-æм республикон конкурс «Зæрдæ лæвар кæнын сывæллæттæн»-ы уæлахиздзау сси Æрæфы районы æвзонг натуралистты станцæйы ахуыргæнæнæг Хуадонты Фатимæ. Ныр фæлтæрдджын ахуыргæнæг Ирыстоны кад хъахъхъæндзæн конкурсы федералон къæпхæны.
Экологон-биологон номинацийы уæлахиздзау, йæ равзæрст дæсныйадмæ куыдфæндыйæ цæстæй кæй нæ кæсы, уымæн йæ радон уæлахиз æвдисæн у. Хуадонты Фатимæ 28 азы размæ йæ зæрдæ радта сывæллæттæн. Ахуыр сæ кæны æрдз уарзыныл, нæ фыдæлтæй нын цы хæзнатæ баззад, уыдон бахъахъхъæныныл. Йæ уроктæ саразы дыууæ æвзагыл -мадæлоныл æмæ уырыссагыл. Архайы, цæмæй иу урокæй иннæмæ сывæллæттæн цымыдисаг дæр уой йæ равзæрст темæтæ.
Бибайты Эльзæ, Æрæфы районы æвзонг натурæлистты станцæйы директор: «Станцæ кæдæй кусы, уæдæй ацы конкурсы дыккаг хатт рамбылдтам. Дызæрдыг нæ кодтам Фатимæ фыццаг бынат кæй райсдзæн, ууыл. Дарддæр дæр ын нæ зæрдæ зæгъы стыр æнтыстдзинæдтæ».
Хуадонты Фатимæ куыд зæгъы, афтæмæй уæлæмхасæн ахуырады фæрцы, бирæтæн вæййы фадат сæ арæхстдзинад, сæ уарзондзинад цавæрдæр хъуыддагмæ раргом кæнынæн. Ардæм сывæллæттæ цæуынц барвæндонæй, æрдзон фæзындтытæ иртасынмæ. Фатимæйы уроктæ уæлдай цымыдисагдæр сты аивадимæ сæ кæй бæдты, уымæй.
Хуадонты Фатимæ, Æрæфы районы æвзонг натурæлистты станцæйы хъомылгæнæг: «Конкурсмæ куы цыдтæн, уæд фыццаг бынат райсын æнхъæл нæ уыдтæн. Фæлæ мын сæйраг дæр вæййы мæ зонындзинæдтæ сбæрæг кæнын, мæхи бафæлварын. Мæ урок уыди экологийыл. Уымæй уæлдай ма йæ сбастон Æрæфы районы экологийы историимæ».
Станцæйы хъомылгæнджытæ тынг зæрдиагæй архайынц, æмæ æцæгдæр сæ зæрдæтæ лæвар кæнынц рæзгæ фæлтæрæн. Нæ зивæг кæнынц сæ хъомылгæнинæгтимæ алыхуызон конкурстæ æмæ викторинæты архайынмæ.
Хуадонты Фатимæ та ма йæ ныфс бахаста инвæлид сывæллæттæн æххуыс кæнынмæ дæр. Уыцы сыгъдæг удтимæ кусгæйæ сын æмбарын кæны æрдзмæ уарзондзинад, йæ ахорæнтæ. Сæ ныййарджытæ дзы тынг арфæйаг сты, уымæн æмæ хъæуты ахæм сабитимæ кусынæн зæрдæйы фæндон фадæттæ нæй.
Фатимæйы ахуырдзауты куыстытæ республикон равдыстыты арæх вæййынц хуыздæрты æмрæнхъ. Йæхæдæгдæр конкурсты архайгæйæ равдисы йæ зонындзинæдтæ. Ныр дæр æй ис ныфс, уæлæмхасæн ахуырады педагогты ‘хсæн «Зæрдæ лæвар кæнын сывæллæттæн»-ы конкурсы федералон къæпхæны æмбæлгæ уагыл йæхи кæй равдисдзæн, уымæй.
