Сæрмагондæй уый тыххæй Мæскуыйы федералон клиникæтæй ссыдысты хуыздæр специалисттæ
Низ рагацау базонын, æмæ æххуыс афоныл бакæнын. Ацы хъуыддæгтыл æрдзырдтой сæрмагонд семинары. Лекцитæ дзы бакастысты Константин Хабенскийы хæрзаудæн Фонды раззагдæр эксперттæ. Семинар цыди 2 боны, æмæ бæлвырддæр хабæрттæ радзурдзæн Томайты Батраз.
Æртæаздзыд Алинæ æмæ цыппараздзыд Давид сæхицæн дзæбæх хъазынц, фæлæ сæхи хæдзары нæ. Сты рынчындоны. Сæ цæсгæмттыл æппынæдзухдæр маскæтæ. Уый пандемияимæ баст нæу. Сабитæ сты лейкозæй рынчын.
Сабитыл сæ ныййарджытæ тынг аудынц. Уыдонæй аразгæ у кæстæрты зæрдæйы ахаст. Кæй зæгъын æй хъæуы, диагноз куы базыдтой, уæд цавд дурау фесты, зæгъы Давиды мад Хъуылаты Маринæ. Фæлæ уымæ цæттæ ничи вæййы. Хъæуы æппæт хъарутæ сæмбырд кæнын, æмæ дæ сывæллонæн æххуыс кæнын.
Сывæллæтты диагноз сбæлвырд кодтой Мæскуыйы. Уым райдыдтой фыццаг дзæбæхгæнæн мадзæлттæ кæнын. Уый фæстæ ссыдысты сæхимæ, цæмæй ацæуой химиотерапийæ. Аст азы размæ ахæм фадат нæ республикæйы нæ уыди. Цалынмæ сывæллæтты республикон клиникон рынчындоны центр нæ байгом ис, уæдмæ. Ныр та рынчын сабитæн сæ бон у сæхи дзæбæх кæнын гематологийы, онкологийы æмæ ревматологийы иугонд хайады. Ам сын кæнынц иртæстытæ, лабораторон диагностикæ, компьютерон томографи æмæ МРТ. Ахæм иртæстытæ сывæллæттæн кæнынц наркозимæ.
Операцитæ, раздæрау, нæ кæнынц. Фæлæ æхсызгон у, уыйбæрц бирæ рынчын сабитæ нæм кæй нæй, уый, зæгъынц рынчындоны. Кæстæртæн оперативон æххуыс исыны фадат ис хуыздæр федералон клиникæты, квотæмæ гæсгæ. Абоны онг онкологон хыгъды нæ республикæйы лæууынц сæдæ æхсай сывæллоны. Уыдонæй центрон нервыты системæ хъыгдард у рынчынты дыууын прцентæн. Уыцы фарстайыл æрныхас кодтой Дзæуджыхъæуы. Нейроонкологон онлайн-семинар Цæгат Ирыстоны сарæзта Константин Хабенскийы Фонд. Сæрмагондæй уый тыххæй Мæскуыйы федералон клиникæтæй ссыдысты хуыздæр специалисттæ. Афæдз æмæ рдæгмæ сын регионмæ ацæуын бантыст фыццаг хатт. Скодтой лæвар æркаст, æмæ аныхас кодтой цæгатирыстойнаг дохтыртимæ. Дохтыртæй дарддæр ма семинары архайдтой волонтертæ.
Семинары æрдзырдтой нырыккон дзæбæхгæнæн мадзæлттыл. Бирæ эксперттæ стажировкæ кодтой фæсарæнты. Зæгъæм, Ольга Желудкова. Сывæллæтты онкологæн йæ фæлтæрддзинад æгæрон у. Кусы æртын азæй фылдæр. Æмæ куыд зæгъы, афтæмæй онкологон низтæй рынчын сывæллæтты нымæц фылдæр нæ кæны. Уыимæ ма ахæм низтæ æнцондæр иртасæн сси. Рагацау низ куы базонай, уæд та йæ сдзæбæх кæнын дæр æнцондæр у.
Семинар саразджыты хъуыдымæ гæсгæ дзы архайдтой нæ республикæйы 165 медикы. Арæзт æрцыд Цæгат Ирыстоны медицинон академийы. Трансляци та цыди интернеты уылты. Бирæтæн фадат уыд сæ фæрстытæ раттынæн. Дохтыртæ та эксперттимæ аныхас кодтой сæхæдæг.
Константин Хабенскийы Фонд баххуыс кодта мингай сывæллæттæн. Иуæй фæрæзтæй æххуыс кæны рынчынтæн, иннæмæй та æххуыс кæны медицицнон кусджытæн ног зоныныдзинæдтæ æмæ фæлтæрддзинад исынæн. Уый та фадат дæтты рухс фидæнмæ, ома æнæ онкологон низтæй тырнынмæ.
