Кадджын æмбырд ацыд Мæскуыйы Уæлахизы музейы. Æмбырд баст уыд зындгонд адмиралы 85 азы юбилейимæ
Контр-Адмирал Гокъинаты Виктор хорзæхджынгонд æрцыд «Ирыстоны Намысы» орденæй. Кадджын æмбырд ацыд Мæскуыйы Уæлахизы музейы. Æмбырд баст уыд зындгонд адмиралы 85 азы юбилейимæ. Цæгат Ирыстоны сæргълæууæджы номæй йын кадджын хæрзиуæг радта нæ республикæйы æххæстбарджын минæвары хæдивæг Мæскуыйы Игорь Барсков. Крейсер «Минск»-ы фыццаг командæгæнæгæн арфæ кодтой экипажы уæнгты æрвылазон фембæлды. Уæ зæрдыл уын æрлæууын кæндзыстæм, крейсер нымад æрцыд Уæрæсейаг флоты хуыздæр наутæй иуыл. Стæй ма йæ намыс æмæ æфсæддон техникæйы ахсджиагдæр иуæгыл. 30 азы размæ, Советон Цæдис куы фехæлд, уæд нау ракодтой флоты хыгъдæй. Гокъинаты Виктор райгуырд Мæздæджы. Фæцыд зын фæндæгтыл. Райдыдта Ленинграды Уæлдæр æфсæддон-денджызон училищæйы курсантæй æмæ сси Советон Цæдисы Флоты контр-адмирал. Кадджын æфсæддонæн арфæйы фыстæг æрбарвыста Уæрæсейы Президент Владимир Путин. Юбилярæн раарфæ кодтой Мæскуыйы Ирон æхсæнады минæвæрттæ дæр. Æмбырды кадджын уазджыты хсæн уыдысты инæлар-булкъон Баскаты Аркадий, инæлар-лейтенант Ходы Алыксандр æмæ бирæ æндæр зындгонд адæм.
