Хицауады уæнгтæ æмæ медицинон куыстуæтты разамонджытæ видеоконференцийы фæрцы æрныхас кодтой стационарты уавæрыл
Коронавирусы инфекци дарддæр парахат кæнын ма бауадзыны Оперативон штабы æмбырдæн разамынд лæвæрдта республикæйы Сæргълæууæг Битарты Вячеслав. Хицауады уæнгтæ æмæ медицинон куыстуæтты разамонджытæ видеоконференцийы фæрцы æрныхас кодтой Цæгат Ирыстоны стационарты уавæрыл.
Бæлвырддæр та дзы цавæр мадзæлттæ арæзт цæуынц низы ныхмæ, ууыл. Къæпхæнгай нæ регионы лæмæгъдæр кæнынц хи хъахъхъæнæн домæнтæ. Кæд пандемийæ сабыргай къаддæргæнгæ цæуы, уæддæр дохтыртæ, раздæрау, сидынц адæммæ, цæмæй хи хъахъхъæнæн æмæ дезинфекцион фæрæзтæй дарддæр пайда кæной. Афтæмæй коронавирусы инфекцийы ног уылæн не руадздзыстæм, зæгъынц медиктæ.
Йæ раныхасы Битарты Вячеслав бафиппайдта, фæстаг мæйты дæргъы медицинон кусджыты архайд кæй фæахадгæдæр ис, уый. Æнæмæнг хъæугæ хъуыддаг у, цы кадрты резерв фæзынд, уырдæм цæмæй хаст æрцæуой фæлтæрдджын специалисттæ. Уыдонæн сæ бон кусын у къуырцдзæвæны уавæрты, стæй ма сæ фæлтæрддзинадыл æфтауынц, медицинон къабазы фыццаг къахдзæфтæ чи кæны, уыдоны.
Уæвгæ, республикæйы цæрджыты æнæниздзинад у фыццаградон хæстæй иу, загъта Битарты Вячеслав. Профилон ведомствоты зæрдыл та æрлæууын кодта, медицинон кусджытæн кæй хъæуы афоныл фиддонтæ кæнын.
