Цы уавæры сты ныртæккæ цардархайды объекттæ, æмæ дзы цы куыст цæуы, вирус ма апарахат
Коронавирус ма руадзыны тыххæй адæмимæ æмбарынгæнæн куыст кæнынц æрмæст Дзæуджыхъæуы нæ, фæлæ республикæйы районты дæр. Цы уавæры сты ныртæккæ цардархайды объекттæ, æмæ дзы цы куыст цæуы, вирус ма апарахат.
Æрыдоны сквертæ, парктæ æмæ аллейæтæ хур бон дæр сты афтид. Раздæр-иу æдзух ам уыди сæдæгай адæмтæ, фæлæ ныр уавæр домы бæрнон цæстæнгас.
Æрыдонмæ коронавирус нырма нæ ныххæццæ, фæлæ бынæттон администрацийы хъуыдымæ гæсгæ, цин кæнынæн нырма раджы у. Аразын хъæуы алы мадзæлттæ, цæмæй инфекци хæдзæрттæм ба бацæуа. Хъыгагæн, Æрыдоны сæрмагонд службæ нæй. Уымæ гæсгæ дезинфекцийы фарста æвæрд ис цæрджытыл сæхиуыл. Ныр къуырийы бæрц бирæфатерон хæдзæрттæм районы депуаттæ ласынц дезинфекцигæнæн таддаг.
Æрыдоны районы центрон рынчындон короновирусы хъуыддагимæ æнцон уавæры ннæй. Районы сæргълæууæджы ныхæстæм гæсгæ, сæм нæй медицинон маскæтæ. Фæлæ, дохтырты æнæ æдасдзинады фæрæзтæй нæ уадзынц.
Камбилеевскæйы скъола нæ кусы мартъийæ нырмæ. Фæлæ æнæ зонындзинæдтæй сывæллæттæ нæ баззайынц. Ныр сæм къуырийы бæрц ис дистанцион ахуырад. Ацы системæмæ гæсгæ кусыныл фæлварынц хæххон скъолатæ дæр.
Карз фæткмæ гæсгæ кусы Горæтгæрон районы рынчындон. Раздæр тагъд æххуысы рынчындонмæ кæй ластой, уыцы рынчынты иу хай ныр къуыри æртæ хатты ласынц ардæм. Коронавирусæй цы рынчынтыл дызæрдыг кæнынц, уыдонæн та лæггад кæнынц 4 мобилон бригады.
Коронавирус нæ баурæдта районы арæзтадон куыст дæр. Кæронмæ фæхæццæ кæны Михайловскæйы амбулаторийы арæзтад дæр. Куыд нысан кæнынц, афтæмæй суткæмæ лаггад кæндзæни 100 адæймагæн. Бынæттон администраци аразджытæн кæны алы фадæттæ, цæмæй пайда кæной æдасдзинады мадзæлттæй, уый тыххæй. Районты бынæттон администрациты сæргълæуджытæ æмархайд кæнынц бизнесы минæвæрттимæ.
Специалисттæ рæстæгæй-рæстæгмæ кæнынц, базарады къабазы цы амалхъом адæм архайынц, уыдонимæ æмбарынгæнæн ныхас, цæмæй æнæмæнг хъæугæ продукттыл æргътыл ма фтауой.
