Уый тыххæй Битарты Вячеславæн фехъусын кодта республикæйы æнæниздзинадхъахъхъæнынады министр Годжысаты Тамерлан
Коронавирусæй гуырысхо кæуыл кæнынц, уыдонмæ æркæсынмæ цæттæ сты Цæгат Ирыстоны æппæт медицинон куыстуæттæ дæр. Уæдæ рынчындæттæ та æххæстæй ифтонг сты сæрмагонд диагностикон кусæнгæрзтæй. Уый тыххæй Битарты Вячеславæн фехъусын кодта республикæйы æнæниздзинадхъахъхъæнынады министр Годжысаты Тамерлан. Бæрнон кусджытæ бабæрæг кодтой республикæйы тагъд æххуысы клиникон рынчындон. Снысан кодтой, æнæмæнг хъæугæ диагностикæ чи кæндзæн, ахæм специалистты хыгъд, загъта министр. Цæгат Ирыстоны сæргълæууæг бафарста хосты æмæ медицинон кусæнгæрзты тыххæй, бабæрæг кодта цалдæр хайады. Се хсæн гастроэнтерологи æмæ гинекологи. Уым кæронмæ фесты рацарæзты куыстытæ. Рæхджы сæ сифтонг кæндзысты кусæнгæрзтæй, æмæ цæттæ уыдзысты рынчынты исынмæ. Фæстæдæр Битарты Вячеслав бабæрæг кодта регионы афтектæй иу, æмæ аргъ скодта йæ ифтонгдзинадæн. Афтечы кусджытæ куыд загътой, афтæмæй фæстаг рæстæг æлхæнджыты нымæц зынгæ фæфылдæр. Фæлæ æнæмæнг хъæугæ хостæй цух не ййафынц. Дефициты сты æрмæстдæр медицинон маскæтæ. Æргътæ дæр баззадысты, куыд уыдысты, афтæ. Уæ зæрдыл уын æй æрлæууын кæндзыстæм, Цæгат Ирыстоны Сæргълæууæг бафыста Указ, коронавирусы инфекцийы ныхмæ тох кæныны мадзæлтты тыххæй. Документмæ гæсгæ, тæссаг бæстæтæй нæ республикæмæ чи ссыди, уыдон хъуамæ æвæстиатæй фехъусын кæной сæ балцы, æмæ кæд сыздæхтысты, уый тыххæй сæрмагонд телефонмæ бадзургæйæ 8- 800-301-20-68.
