Хæриангæй ифтонг кæныны къабаз цалдæр мæйы æххæст тыхтæй нæ куыста
Коронавирусы аххосæй цы фæтк фидаргонд æрцыди, уымæй къуылымпы кодтой бирæ куыстуæттæ. Хæриангæй ифтонг кæныны къабаз цалдæр мæйы æххæст тыхтæй нæ куыста. Фæстæдæр Цæгат Ирыстоны кафеты æмæ ресторанты скуыстой верандæтæ. Ныр та сæ дуæрттæ уæрæх байгом кодтой уазджытæн. Раздæры фæткмæ гæсгæ скуыстой фитнес-центртæ æмæ дуканитæ дæр. Цы ивддзинæдтæ æрцыди сæ куысты, уый тыххæй радзурдзæн Хъайтыхъты Фатимæ.
Нæ куыст бирæ фæрогдæр. Афтæ зæгъынц, ацы сервисон центры кусджытæ, коронавирусы тыххæй фæтк ист куы æрцыди, уæд. Раздæр куыстой дæрддзæфмæ. Базарад кодтой интернеты уылты. Куысты ахæм фæтк æнæ фæзынгæ нæ фæцис се фтиæгтыл. Уымæ гæсгæ ныртæккæ архайынц раздæры тыхтæ раздахыныл. Куысджыты хъуыдымæ гæсгæ сæйрагдæр у, иууылдæр куыстмæ цæттæ кæй сты, уый.
Кæд ныртæккæ товартæ æмæ лæггæдты къабаз ногæй йæ раздæры фæткмæ гæсгæ кусы, уæддæр адæм иууылдæр хъуамæ æххæст кæной æдасдзинады домæнтæ. Ацы кафейы æдзух кæнынц дезинфекци, кусджытæ маскæты æмæ æрмкъухты. Уæдæ социалон дистанци дæр æххæст кæнынц.
Хи изоляцийы фæтк кæй фæцис, уыцы хъусынгæнинагыл цингæнгæйæ сæмбæлдысты республикæйы спортивон залты дæр. Ацы къабазы куыст дæр пандемийæйы æртæ мæймæ зынгæ къулымпыдзинæдтæ бавзæрста. Дæрддзæфмæ кусын фитнес-центрты бон нæу.
Æрвылбоны фæткмæ цард раздæхти зæгъгæ, ууыл нырма раджы у дзурын. Раздæрау нæй театралон, культурон-рухстауæн, ирхæфсæн æмæ æндæр æхсæнадон мадзæлтты архайын. Æхгæд уал сты кинотеатртæ æмæ сывæллæтты ирхæфсæн центртæ. Уымæй уæлдай, 9-æм августмæ хи изоляцийы фæтк хъуамæ æххæст кæной, 65 азæй уæлæмæ кæуыл цæуы, ахæм адæм.
