Фыццаджыдæр стыр æргом аздæхтой – 2021-æм азмæ фиддонтæ адарддæр кæнынмæ
Коронавирусы инфекци парахат кæныны рæстæг амалхъом адæмæн куыд баххуыс кæнæн ис, ууыл æрныхас кодтой хицауады уæнгтæ. Брифингы архайдтой республикæйы базарадон-промышленнон палатæйы разамонæг Тугъанаты Хъазыбег, экономикон рæзты министр Томайты Хъазыбег стæй Æппæтуæрæсеон æхсæнадон организаци «Деловая Россия»-йы регионалон хайады советы сæрдар Абиаты Роман. Фыццаджыдæр стыр æргом аздæхтой – 2021-æм азмæ фиддонтæ адарддæр кæнынмæ.
Уыимæ рæстæгмæ баурæдтой куыстуæтты бæрæггæнæн куыст. 50% та фæкъаддæр кæнынмæ хъавынц ацы азæн исбоны хъалонтæ. Уый хауы хъæууонхæдзарадон куыстуæтты траснпортон хъалонтæм. Муниципалитеттæн та бацамыдтой æнæстационарон базарадон объекттæ арендон фиддонтæй суæгъд кæнын. Уымæй дарддæр æнхъæлмæ кæсынц федералон фæрæзтæй 75 милуан сомы райсынмæ. Уыдонæй баххуыс кæндзысты чысыл æмæ астæуккаг куыстуæтты микрофинансты фондæн.
Цæудзæн республикон æххуыс дæр. Ацы зын эпидемиологон уавæры хъыгдард чи баййæфта, æмæ кусджытæн мызд бафидын кæмæн хъæуы, уыдонæн сæ бон у фондмæ курдиат ныффыссын. Хорзыл æй куы банымайой, уæд сын ратдзысты 50-йæ – 300 мин сомы онг. Амалхъом адæмæн ма сæ бон у милуан сомы онг æфстау райсын. Федералон æххуысы мадзæлтты хыгъд кæны уæрæхдæр. Регионалон мадзæлттæ дæр аразгæ уыдзысты уавæрæй.
