Сывæллæтты дзы астрономи ахуыр кæндзысты ирон æвзагыл
Космонавтикæйы скъолайы байгом кодтой сæрмагонд къорд. Сывæллæтты дзы астрономи ахуыр кæндзысты ирон æвзагыл. Проект у пилотон. Йæ саразын уыд, скъолайы бындурæвæрæг Къомайты Русланы хъуыды. Къорды архайджытæ сты Алайнаг гимназы 4-æм къласы ахуырдзаутæ. Цавæр программæмæ гæсгæ æмæ цас рæстæг ахуыр кæндзысты, уый тыххæй радзурдзæн Хъайтмазты Дзерассæ.
Фыццаг бакастæй, æнахуырæй ницы ис. Хуымæтæг урок космонавтикæйы скъолайы. Фæлæ цæуы ирон æвзагыл. Æмæ уый у ногдзинад. Сывæллæттæ астрономи ирон æвзагыл кæм ахуыр кæндзысты, ахæм къорд байгом кæнын – у космонавтикæйы скъолайы æмæ Алайнаг гимназы иумæйаг проект. Ахуыры райдианы фæдыл рæзгæ фæлтæрæн раарфæ кодтой ахуырады æмæ наукæйы министр Алыбекты Эллæ æмæ республикæйы раздæры сæргълæууæг Битарты Вячеслав. 3 азы размæ ацы скъола йе *ххуысæй байгом ис.
Милдзыхты Зауыр у Алайнаг гимназы 4-æм къласы ахуырдзау. Фидæны йæ фæнды космонавт суæвын. Уырны йæ, ацы къорды ахуырад ын баххуыс кæндзæн космосы сусæгдзинæдтæ раргом кæнын æмæ йæ бæллиц æрбахæстæг кæнын.
Алайнаг гимназы 15 ахуырдзауы систы пилотон проекты фыццаг архайджытæ. Бацæттæ сын кодтой сæрмагонд программæ «Дун-дуне». Хауы йæм 4 модулы. Йæ автор у космонавтикæйы скъолайы уæлæмхасæн ахуырады педагог Теджетты Жаннæ. Полилингвалон системæмæ гæсгæ куысты йæм ис стыр фæлтæрддзинад.
Ахуыртæ цæудзысты къуыри 2 хатты. Иу урок уыдзæн Алайнаг гимназы бындурыл, иу та ма – космонавтикæйы скъолайы. Арæзт цæудзысты æнцонæмбарæн хъазæн хуызы.
Программæ иу ахуырадон аз ахæсдзæн. Уыцы рæстæгмæ сывæллæттæ базондзысты бирæ цымыдисаг хабæрттæ космосы тыххæй.
Ацы проекты алы лыстæг хъуыддагыл дæр лæмбынæг бакуыстой – курсы номæй – сывæллæттæн сæрмагонд кусæн тетрæдты онг. Суанг ма къорд байгом кæныны бон дæр хуымæтæджы нæ равзæрстой. 1957-æм азы октябры орбитæмæ суагъдтой дунейы Зæххы фыццаг аразгæ спутник.
Къомайты Русланæн цы традицитæ сфидар кæнын бантыст, уыдонмæ гæсгæ скъола абон дæр кусы. Ам дарддæр дæр фæнд кæнынц, космос æгæрон уарзтæй чи уарзта, æмæ Ирыстон стъалытæм чи æрбахæстæг кодта, уыцы адæймаджы фæндтæ æххæст кæнын.
