Ис дзы нырыккон медицинон техникæ
Къостайыхъæуы кадджын уавæры байгом кодтой ног амбулатори. Ис дзы нырыккон медицинон техникæ. Уæдæ специалисттæй дæр цух нæ уыдзæн. Объект арæзт æрцыд, æнæниздзинадхъахъхъæнынады рацарæзты сæрмагонд программæмæ гæсгæ. Кæмæн лæггад кæндзæн ног бæстыхай, уый тыххæй радзурдзæн Тъехты Элинæ.
Къостайыхъæуы ног амбулатори бакодтой кадджын уавæры, национ æртæ чъирийымæ æмæ хистæрты куывдтытимæ. Мадзалмæ æрбацыдысты хъæуы цæрджытæ æмæ æнæниздзинадхъахъхъæнынады министр. Зæронд бæстыхай уыд аварион уавæры. Ног амбулатори сарæзтой æнæниздзинадхъахъхъæнынады модернизацийы программæмæ гæсгæ.
Амбулаторийы кусынц 3 специалисты. Уыдон сты: иумæйаг практикæйы дохтыр, медицинон хо æмæ фельдшер. Медицинон æххуыс кæнынц куыд хистæртæн, афтæ сывæллæттæн дæр. Уымæй уæлдай ма хъæуы цæрджытæ æнæниздзинадхъахъхъæнынады министрæн радзырдтой, фылдæр специалисттæ сæ кæй хъæуы, уый.
Мамиаты Эсмеральдæ у иумæйаг практикæйы дохтыр. Куыд зæгъы, афтæмæй ног бæстыхайы кусын уæлдай æхсызгон у. Амбулаторийы ис, инфаркт æмæ инсульты рæстæг адæмæн тагъд æххуысы препараттæ. Сарæзтой дзы сылгоймæгты дохтыры æмæ педиатры кабинеттæ. Кæй зæгъын æй хъæуы, хъæугæ техникæ дæр дзы ис.
Æнæниздзинадхъахъхъæнынады министрад бафыста бадзырд коммерцион организацийымæ, цæмæй амбулатори хостæй ифтонг кæна, уый тыххæй. Республикæйы сæргълæууæджы уынаффæмæ гæсгæ 2022 азы фельдшерон – акушерон пунктты æмæ амбулаториты бакодтой, хостæ гыццыл бæрцыты æлхæнæн кæм ис, ахæм пункттæ. Къостайыхъæуы афтек нæ уыд. Ныр хостæ балхæнæн уыдзæн амбулаторийы. Хъæуы цæрджытæн ма сæ бон уыдзæн лæвар хостæ дæр исын. Уæлдай æнцондæр та сæкæрнизæй рынчын адæмæн фæци. Ныр сæ районы центрмæ цæуын нал хъæудзæн. Хостæ исдзысты амбулаторийы.
Фæстаг æртæ азмæ Къостайыхъæуы сарæзтой культурæйы хæдзар, бындурон цалцæг скодтой скъолатæ, ныр та ма бакодтой ног амбулатори. Уымæй уæлдай ма программæмæ гæсгæ дыууæ амбулаторийы сарæзтой Хъарман – Сындзыхъæуы. Бындурон цалцæг кæнынц станицæ Луковскæйы амбулатори, стæй фельдшерон – акушерон пункт Цæлыккаты хъæуы.
