Уæвгæ æхснырсæгæй рынчынтæ гыццыл нæй, фæлæ статистикæмæ гæсгæ, фаронимæ абаргæйæ, дзæвгар къаддæр.
Коронавирусæй дарддæр ма адæймаджы æнæниздзинад цудын кæнынц æрдзы афонмæ гæсгæ низтæ дæр. Зымæджы адæм арæхдæр рынчын кæнынц. Фæлæ дохтыртæ зæгъынц, ацы аз ковиды ныхмæ мадзæлттæ арæзт кæй цыдысты, уыдон хорзырдæм кæй фæбæрæг сты. Скъолаты дæр стыр æргом здахынц сывæллæтты æнæниздзинадмæ. Сæхгæндзысты сæ карантины æви нæ, уый тыххæй радзурдзæн Касаты Наирæ.
Дзæуджыхъæуы 28-æм скъолайы кълæстæ иууылдæр сты дзаг. Рынчынтæ дзы нæй, зæгъы скъолайы директор Гуыриаты Людмилæ. Алы райсом дæр ахуырады æмæ наукæйы министрадмæ арвитынц дзуаптæдтæн рапорт, скъолайы цал ахуыргæнинаджы ис, уый тыххæй.
Фæлхасадмæ цæстдарды управленийы зæрдыл лæууын кæнынц, фæстаг цалдæр азы афæдзы ацы афон ахуыргæнæндæтты вæййы карантин. Уымæн æмæ рынчынтæ вæййы бирæ. Ацы аз хъуыддаг у бирæ хуыздæр.
Эпидемиологтæ зæгъынц, сывæллæттæ, фаронимæ абаргæйæ, рынчын кæнынц къаддæр. Уымæн баххуыс ис, коронавирусы пандемийæйы тыххæй цы сæрмагонд фæтк конд æрцыди, уый дæр. Уый – алы райсом буары тæвд барын, антисептиктæй пайда кæнын æмæ къухтæ арæхдæр æхсын.
Сывæллæтты 1-æм поликлиникæйы дæр разы сты, сывæллæттæ ацы аз къаддæр кæй рынчын кæнынц, уыцы хъуыдыимæ. Амæй размæйы азты-иу сезонты хсæн рæстæг алы терапевт дæр иу бонмæ 30 хаттæй къаддæр нæ рацыди рынчынмæ хæдзармæ. Абон поликлинæкæйы къæридортæ, зæгъæн ис, æмæ сты афтид. Уæвгæ æхснырсæгæй рынчынтæ гыццыл нæй, фæлæ статистикæмæ гæсгæ, фаронимæ абаргæйæ, дзæвгар къаддæр.
Анна Аркадьева æрбацыди йæ æртæаздзыд Сашæйы æнæниздзинад сбæрæг кæныны тыххæй. Сывæллон дыууæ къуырийæ фылдæр хуыфы, цалдæр боны йæм уыди тæвд дæр. Ныр дохтыр загъта, кæй адзæбæх æмæ æнæниз кæй у, уый. Рæвдауæндонмæ йын цæуæн ис. Æрмæст, æнæниз кæй у, ахæм æвдисæндаримæ.
Уæвгæ æппæты æнæнхъæлæджы сезон æхснырсæгæн нырма разæй ис. Рынчынты нымæц сбирæ вæййы уалдзæджы райдиан. Специалисттæ зæрдæ дарынц, уавæр бынтон зæрдæхсаинаг кæй нæ расайдзæн, ууыл.
